Во момент кога водата од чешмите е небезбедна, неопходна е брза реакција. Истовремено, сите детали за набавката треба да бидат јавно објавени за да нема простор за политички манипулации.
СДС има право да бара отчетност, но останува прашањето дали во ваква вонредна ситуација навистина очекувала граѓаните да чекаат да заврши тендерската постапка додека се соочуваат со недостиг од безбедна вода?.
Во услови на здравствена криза, кога граѓаните итно имаат потреба од безбедна вода за пиење, отворањето редовна тендерска постапка би можело дополнително да ја одолжи испораката. Во вакви околности, приоритет треба да биде навременото обезбедување вода за населението, со почитување на законските постапки предвидени за итни набавки.
СДС претходно обвини дека преку Службата за општи и заеднички работи бил склучен договор вреден околу 100.000 евра со компанијата „Кожувчанка“, без објавување јавен оглас. Според опозициската партија, станува збор за компанија во сопственост на градоначалникот на Кавадарци, Митко Јанчев.
Владата ги демантира обвинувањата на СДС за набавката на вода за пиење наменета за жителите на Гостивар, каде што поради контаминација беше забранено користењето на водата од градскиот водовод.
Од Владата велат дека водата била набавена по цена од 12,5 денари за шише, наместо по редовната цена од околу 25 денари. Оттаму ги отфрлаат тврдењата дека набавката претставувала сомнителна деловна зделка.
Обвинувањата на СДС го отвораат и прашањето како самата партија би постапила доколку беше на власт во време на ваква криза. Ќе распишеше ли тендер за набавка на вода, а граѓаните ќе требаше да чекаат да се напијат вода дури откако ќе заврши целата тендерска постапка?
Дали СДС не добила информации од своите луѓе во Гостивар, кои исто така чекале да добијат пакети со чиста вода за пиење, или, пак, партиското раководство тајно обезбедувало вода само за своите раководни кадри во градот?
Зарем во СДС нема никој доволно разумен да ги посоветува пред да испраќаат вакви жални и истовремено смешни соопштенија?
