На 18 ноември 1944 година, во попладневните часови, Петнаесеттата македонска бригада на 48. дивизија прва влегла во Гостивар. Градот бил ослободен истиот ден, во завршните операции на Народноослободителната војска на Македонија во западниот дел на земјата.
На ослободувањето на Гостивар му претходеле тридневни борби во Кичевско. Од 15 до 17 ноември, на потегот од Кичево преку Зајас до Туин, единиците на 15. македонски корпус го совладале отпорот на балистичките формации и на помали германски единици.
По нивното повлекување кон Полог, на 18 ноември изутрината корпусот тргнал кон Гостивар во три правци. При влегувањето во градот, борците на 48. дивизија наишле на слаб отпор.
Следниот ден, на 19 ноември, завршило разоружувањето на преостанатите вооружени групи во Гостивар и околните села. Истиот ден било ослободено и Тетово, кон кое од правецот на Скопје напредувале единиците на 16. корпус.
Со ослободувањето на Тетово завршиле операциите за ослободување на западна Македонија.
