Коњаниците од Коњаницата „Св. Јован Бигорски – Патот на Црешовото Топче“ денес беа свечено и срдечно пречекани во црквата „Св. Јован Крстител“ во кичевското село Староец.
Во знак на признание за нивната истрајност и за долгогодишното минување низ Староец на патот кон славното Крушево, на коњаницата ѝ беше врачена благодарница. Ова признание претставува благодарност за негувањето на илинденските традиции и за зачувувањето на споменот на македонските револуционери и нивната борба за слободна Македонија.
Прекрасните домаќини од Староец им приредија топло добредојде на коњаниците и обезбедија кратко освежување и одмор пред продолжувањето на маршот.
По средбата исполнета со почит, братство и македонски патриотски дух, коњаницата го продолжи патот кон Вранештица. Оттаму таа ќе продолжи по патеките на илинденците кон својата крајна цел – Мечкин Камен во Крушево, каде што ќе се поклони пред жртвата на хероите од 1903 година.
Овој пречек уште еднаш потврди дека „Патот на Црешовото Топче“ не е само коњички марш, туку жив завет што ги поврзува македонските села, храмови и поколенија во почитта кон Илинден и Македонија.
