Премиерот Христијан Мицкоски, во рамки на работната посета на Истанбул, Република Турција, учествуваше на Бизнис форум посветен на унапредување на бизнис-соработката меѓу Македонија и Турција.
Во своето обраќање, Мицкоски истакна дека Македонија и Турција негуваат традиционално пријателски односи изградени врз доверба, почит и силни врски меѓу двата народа. Токму тие односи, како што посочи, претставуваат цврста основа за продлабочување на економската соработка и отворање нови можности за инвестиции.
Премиерот нагласи дека Македонија денес се позиционира како стабилна и конкурентна бизнис-дестинација, со стратешка географска положба, поволна инвестициска клима, модерни индустриски зони и пристап до регионалните и европските пазари.
Според Мицкоски, турските компании преку инвестирање во Македонија добиваат можност да станат дел од европските синџири на снабдување и да го прошират своето присуство на пошироки пазари.
„Нашата цел е да градиме долгорочни партнерства кои ќе создаваат нови работни места, поголем економски раст и заеднички успех“, порача Мицкоски.
Тој ги покани турските инвеститори да бидат дел од развојната приказна на Македонија, држава која има јасна визија за иднината, отворена врата за нови инвестиции и силна определба за економски развој.
