Премиерот Христијан Мицкоски откри колку средства од државниот буџет биле потрошени за едномесечната програма по повод 35-годишнината од независноста на Македонија.
Од настапот на Стив Аоки, преку музичките програми и настапите во повеќе градови низ земјата, па сè до завршниот концерт на Дејвид Гета во Скопје – Македонија одбележа 35 години независност, а граѓаните за тоа платија нула денари.
– Имам лоша вест за сите оние што шпекулираа, клеветеа и пласираа лажни информации. Сакав секој настан во градовите низ земјата да биде посебен момент за граѓаните. Сите овие настани го чинеа буџетот нула денари. И граѓаните и буџетот сето ова ги чинеше нула денари.
Слободно проверете во „Отворени финансии“ и ќе видите дека граѓаните не платиле ништо. Сè е организирано од општествено одговорни компании – истакна Мицкоски, одговарајќи на новинарско прашање.
Премиерот нагласи дека жали што кај одредени поединци „Фројд работи“, односно што мислат дека и другите би постапувале на начинот на кој тие постапувале.
– Ова е домаќинска и промакедонска Влада, која се грижи за граѓаните. Ова е пронародна Влада во која секој денар од буџетските средства се троши транспарентно – порача Мицкоски.
Тој додаде дека Македонија покажала оти знае, може и умее да организира настани од светски ранг токму овде, во сопствената држава.
ВМРО-ДПМНЕ: Во Македонија може чесно да се заработува
Од ВМРО-ДПМНЕ реагираа дека СДС никако не може да сфати оти и во Македонија може чесно да се заработува, а сето тоа да биде јавно, транспарентно и видливо за граѓаните.
Како пример го посочуваат претседателот на ВМРО-ДПМНЕ и премиер Христијан Мицкоски, кој, како што наведуваат, многупати јавно говорел за тоа како заработувал во својот живот.
Од партијата истакнуваат дека никој досега не посочил оти Мицкоски заработувал нечесно, преку трети лица, фирми во странство или со местење тендери. Напротив, потсетуваат дека станува збор за универзитетски професор кого студентите го избрале за најдобар професор на факултетот.
Од ВМРО-ДПМНЕ велат дека истото не може да се каже за Зоран Заев и Венко Филипче.
Тие прашуваат како Заев и Филипче, покрај примањата што ги добивале како пратеници, министри или градоначалници, стигнале до имот и инвестиции за кои јавноста со години бара одговори.
Во партиската реакција се поставуваат прашања за станови и зграда во Дубаи, „златна виза“, милионска јахта во луксузното летувалиште Паљури на Егејот, акции во индиска авиокомпанија и фирми во соседна Бугарија што на Филипче му обезбедувале автомобили.
Од ВМРО-ДПМНЕ посочуваат дека јавноста со години слуша сомнежи и обвинувања за местење тендери, земање провизии, отпишување државни резерви и задолжување на државата за нечии лични интереси.
Во реакцијата се споменуваат и Коцевски, Абази, Русковска и Кацарска, за кои од партијата тврдат дека се дел од поединците во правосудството што, наместо да обезбедат одговорност, ги штитат поранешните функционери на СДС.
„На раководството на СДС му пречи што настапот на Дејвид Гета, во рамките на одбележувањето на 35-годишнината од независноста на Македонија, ги чинел граѓаните нула денари. Но не му пречела приватната забава во Дубаи со Харис Џиновиќ, за која се тврди дека чинела стотици илјади долари“, се наведува во реакцијата.
Од ВМРО-ДПМНЕ нагласуваат дека сите трошоци за одбележувањето се јавно и транспарентно проверливи преку системот „Отворени финансии“.
Јавноста заслужува одговор: кој чесно заработувал, а кој ја користел власта за лично богатење?
