Нацрт-извештајот на Комитетот за надворешни работи на Европскиот парламент за Македонија, кој го опфаќа периодот до ноември 2025 година, содржи повеќе значајни и позитивни оценки за напредокот на државата и нејзината европска перспектива.
Во документот повторно се потврдува поддршката за членството на Македонија во Европската Унија врз основа на јасен, мерлив и фер пристап, при што се признава посветеноста на државата кон реформите и европската интеграција. Посебно се нагласува дека Македонија е една од земјите со најдолг кандидатски статус и дека долгогодишните одложувања на почетокот на пристапните преговори негативно влијаеле врз довербата на граѓаните во европската перспектива.
Извештајот повикува на зачувување на кредибилитетот и предвидливоста на процесот на проширување, како клучни предуслови за одржување на довербата во европскиот проект.
Особено важен дел од документот е ставот дека јазичниот, културниот и националниот идентитет претставуваат темелни вредности на секоја држава и не треба да бидат доведувани во прашање од трети страни. Воедно, се истакнува дека овие прашања не смеат да влијаат врз процесот на пристапување во Европската Унија, кој треба да се темели на објективни критериуми, заслуги, европски вредности и Копенхашките критериуми.
Во текстот се нагласува и дека билатералните спорови треба да се решаваат преку дијалог, соработка во добра волја и во согласност со меѓународното право, наместо да се користат како средство за блокирање на европските интеграции.
Нацрт-извештајот позитивно ги оценува стабилните меѓуетнички односи во државата, имплементацијата на Охридскиот рамковен договор, како и напредокот во подготовката на патоказите за јавна администрација и владеење на правото во рамки на кластерот „Фундаментални вредности“. Се поздравуваат и умерениот напредок во реформата на јавната администрација, дигиталната трансформација и усвојувањето на законодавството за електронска идентификација.
Дополнително, Европскиот парламент ги поздравува првите чекори во спроведувањето на Реформската агенда и Инструментот за реформи и раст за Западен Балкан, интеграцијата на Македонија во географскиот опфат на СЕПА, како и иницијативата за проширување на режимот „роаминг како дома“ кон земјите од регионот.
Во делот посветен на надворешната политика и регионалната соработка, извештајот ја истакнува конструктивната улога на Македонија во регионалната стабилност, Берлинскиот процес, Заедничкиот регионален пазар и Планот за раст. Посебно се нагласуваат високото ниво на усогласеност со заедничката надворешна и безбедносна политика на Европската Унија, геостратешкото значење на државата како членка на НАТО и подготвеноста за понатамошно продлабочување на соработката со Унијата преку Безбедносното и одбранбено партнерство.
Нацрт-извештајот испраќа јасна политичка порака дека Македонија останува препознаена како европска држава, посветена на реформите, регионалната стабилност и стратешкото партнерство со Европската Унија и НАТО. Истовремено, документот ја потенцира потребата процесот на пристапување да биде кредибилен, предвидлив, фер и заснован на принципот на заслуги.