Македонија и Турција ќе ја продлабочуваат економската и стратешката соработка
На билатералната средба беше потврдена поддршката за нови инвестиции, поголема трговска размена и зајакнување на односите во повеќе области од заемен интерес
Премиерот на Република Македонија, Христијан Мицкоски, денеска оствари билатерална средба со претседателот на Република Турција, Реџеп Таип Ердоган, на која беше потврдена традиционално блиската, пријателска и стратешка соработка меѓу двете држави.
На средбата беше изразено заедничко задоволство од одличните политички односи меѓу Македонија и Турција, кои се темелат на меѓусебна почит, доверба и искрено пријателство меѓу двата народа.
Во фокусот на разговорите беа можностите за дополнително продлабочување на економската соработка, зголемување на трговската размена и привлекување нови инвестиции. Соговорниците разговараа и за унапредување на партнерството во областа на инфраструктурата, енергетиката, туризмот, образованието и одбраната.
Мицкоски ја нагласи важноста на Турција како еден од најзначајните економски и политички партнери на Македонија, посочувајќи дека Владата останува посветена на создавање стабилна, предвидлива и конкурентна деловна средина која ќе поттикне нови турски инвестиции, економски раст и отворање нови работни места.
Претседателот Ердоган ја потврди поддршката на Турција за развојот и просперитетот на Македонија, како и подготвеноста за понатамошно зајакнување на билатералните односи во сите области од заемен интерес.
Во рамките на разговорите беа разменети мислења и за актуелните регионални и глобални предизвици. Притоа беше истакната потребата од зачувување на стабилноста, продлабочување на соработката и поттикнување на економскиот развој како предуслов за напредокот на регионот.
Двајцата државници изразија уверување дека односите меѓу Македонија и Турција ќе продолжат да се развиваат со засилена динамика и во иднина, создавајќи нови можности за економска, политичка и стратешка соработка меѓу двете пријателски држави.
