Македонија очекува фер и предвидлив европски процес, со јасни правила и поголема вклученост на Европската Унија во надминувањето на пречките на патот кон членството.
Премиерот на Република Македонија, Христијан Мицкоски, денеска одржал средба со претседателката на Европската комисија, Урсула фон дер Лајен. Според неговата изјава, на средбата отворено разговарале за европската иднина на Македонија, реформскиот процес и предизвиците на патот кон членство во Европската Унија.
Мицкоски ја потврди определбата Македонија да стане членка на ЕУ, нагласувајќи дека Владата посветено работи на исполнување на реформските обврски. Истовремено, порача дека исполнетите обврски треба да значат конкретен напредок, во процес што нема да остава простор за нови билатерални условувања.
„Нашата определба е јасна и непроменета, сакаме Македонија да биде дел од Европската Унија и посветено работиме на исполнување на реформските обврски“, истакна премиерот.
На средбата се разговарало и за односите со Бугарија, како и за потребата Европската Унија поактивно да се вклучи во создавањето услови за одржливо европско решение. Мицкоски нагласи дека таквото решение треба да се заснова на дијалог, заемно почитување и јасни обврски за сите страни.
Паралелно со дипломатските напори, продолжуваат реформите во владеењето на правото, јавната администрација, економијата, дигитализацијата и образованието. Според премиерот, целта е граѓаните да ги почувствуваат придобивките од европската интеграција уште пред формалното членство — преку повеќе инвестиции, подобра инфраструктура, пристап до европскиот пазар и нови можности за младите.
Мицкоски порача дека Македонија сака процес што ќе се движи напред, ќе создава конкретни резултати и ќе ја зајакне довербата на граѓаните во европската перспектива.
„Верувам дека со поголема вклученост, отворен дијалог и јасна политичка волја можеме да направиме реален исчекор на нашиот европски пат“, нагласи премиерот.
