Премиерот Христијан Мицкоски оствари средба со генералниот секретар на Обединетите нации, Антонио Гутереш, во рамките на учеството на 81. сесија на Генералното собрание на ОН во Њујорк. При посетата на седиштето на светската организација, тој се потпиша и во Книгата на почесни гости.
„Особена чест беше да се потпишам во Книгата на почесни гости на Обединетите нации, како симбол на почитта кон оваа светска организација и нејзината мисија за мир, дијалог и заедничка иднина“, истакна Мицкоски.
Средбата следува по неговото вчерашно обраќање пред Генералното собрание. Во говорот, премиерот се осврна на улогата на ОН во спречувањето конфликти и потсети на превентивната мировна мисија воспоставена во Македонија во деведесеттите години. Тој порача дека меѓународните правила треба да важат еднакво за сите држави, без оглед на нивната големина.
