По Светата литургија, благословот и свечената заклетва во Бигорскиот манастир, здружената коњаница тргна кон Јанче, а потоа преку Галичник ќе продолжи до бачилото Салтаница, носејќи ја пораката за единство, љубов кон Македонија и почит кон илинденскиот завет.
По Светата литургија, примениот благослов и свечената заклетва во Бигорскиот манастир, коњаниците го продолжија својот заветен пат кон Крушево. Нивната денешна маршрута води преку Јанче и Галичник, а вечерва, околу 20 часот, се очекува да пристигнат на бачилото Салтаница, каде што ќе го завршат вториот ден од патувањето.
Посебна вредност на оваа коњаница е тоа што и годинава ги обединува учесниците од различни краишта на Македонија. Иако доаѓаат од различни места, сите ги поврзува истата љубов кон татковината, истата почит кон Илинден и истиот завет – жртвата на македонските илинденци никогаш да не биде заборавена.
Годинашниот коњички марш е посветен на македонското единство. Тој претставува искрен и силен повик до политичките партии, државните институции и до целиот македонски народ да се обединат околу она што е најсвето и што им припаѓа на сите поколенија – Македонија.
Илинденците и асномците ги обединуваше една голема и возвишена идеја – создавање слободна, достоинствена и самостојна Македонија. Пред таа идеја ги надминуваа поделбите, личните интереси и разликите, знаејќи дека само обединети можат да ја извојуваат слободата за која сонуваа генерации Македонци.
Тој свет аманет ни го оставија нам, а наша должност е да го чуваме, да го продолжиме и достоинствено да им го предадеме на идните поколенија. Македонија е поголема од секоја партиска, политичка и лична поделба. Таа е нашиот заеднички дом, нашата историја, нашата сегашност и нашата иднина.
Со Божја помош, коњаниците ќе стигнат до Мечкин Камен, каде што достоинствено ќе им се поклонат на хероите од Илинденското востание и ќе го продолжат аманетот што ни го оставија нивните предци.
Нека Свети Јован Крстител биде нивен молитвен застапник и заштитник на секој чекор од овој благословен пат.
И додека коњите чекорат по македонските планински патишта, со секој удар на нивните копита нека одекнува еден единствен глас:
За кого? – За Македонија!
