Од Светиот Гроб во Ерусалим до Зубовце: благословениот крст пристигнува во храмот „Света Огнена Марина“
Зубовце ги повикува верниците на свечениот пречек на крстот благословен во Ерусалим
На празникот Марена, на 30 јули 2026 лето Господово, во храмот „Света Огнена Марина“ во Зубовце ќе пристигне крст благословен во Црквата на Светиот Гроб на Исус Христос во Ерусалим.
Пред да тргне кон Зубовце, крстот беше положен и благословен на Каменот на Помазанието во Црквата на Светиот Гроб во Ерусалим.
Според христијанското предание, токму на ова свето место било положено телото на Исус Христос по симнувањето од Крстот и било подготвено за погребение.
Благословот добиен на едно од најсветите места во христијанството му дава на крстот особена духовна вредност и длабока симболика.
Од Ерусалим до Зубовце, крстот носи порака на вера, љубов, надеж, мир и заедништво. Неговото пристигнување претставува редок и значаен духовен настан за верниците, за жителите на Зубовце и за цела Македонија.
Крстот, кој ќе му биде даруван на храмот „Света Огнена Марина“, е вреден подарок од Фондот на Холокаустот на Евреите во Македонија и Еврејската заедница во Македонија.
Дарот претставува сведоштво за заемната почит, пријателството и духовната поврзаност меѓу луѓето и заедниците, без оглед на нивната верска или етничка припадност.
За жителите на Зубовце, 30 јули 2026 лето Господово ќе остане запаметен како историски и благословен ден – денот кога крстот, кој го поминал патот од Светиот Гроб во Ерусалим, ќе пристигне во храмот „Света Огнена Марина“, каде што ќе остане како траен симбол на верата, надежта и Божјата љубов.
На 30 јули, на празникот Марена, овој свет дар – крстот благословен во Ерусалим – свечено ќе биде осветен во храмот „Света Огнена Марина“ во Зубовце.
Бог е љубов!