Муцунски од Софија порача дека иднината на Македонија и Бугарија треба да се гради врз почитување, доверба и соработка, а не врз спорови околу историјата, јазикот и идентитетот.
Министерот за надворешни работи и надворешна трговија, Тимчо Муцунски, од Софија испрати јасна порака дека во современа Европа нема место за негирање на идентитетите и за политички притисоци поврзани со историјата, јазикот и националната припадност.
Говорејќи за односите меѓу Македонија и Бугарија, Муцунски нагласи дека силните и самоуверени нации немаат потреба својата посебност да ја докажуваат преку оспорување на другите народи.
„Јас сум цврсто убеден, како човек, дека силните идентитети немаат потреба да се градат преку напади на туѓите идентитети. Напротив, во Европа во 21. век треба да имаме капацитет да ги славиме нашите различности, да се почитуваме и да не се врзуваме со прашања поврзани со историјата, идентитетот и јазикот“, истакна Муцунски.
Министерот оцени дека и Македонија и Бугарија имаат заеднички интерес да градат добрососедски односи и да соработуваат во области од стратешко значење, наместо да остануваат заробени во спорови од минатото.
Според него, двете држави можат многу да добијат од продлабочување на соработката во сферата на одбраната и безбедноста, економијата, образованието и регионалниот развој.
„И нашата држава, но и вашата држава имаат многу да добијат од тој процес. Имаме најпозитивни намери да соработуваме во областа на одбраната и безбедноста, економијата и образованието“, рече министерот.
Осврнувајќи се на сопственото академско искуство, Муцунски потсети дека како универзитетски професор учествувал на бројни меѓународни конференции, вклучително и во Софија, и додаде дека поделбите што се создадоа во последните години не ја одразуваат реалната потреба на граѓаните од двете земји за соработка и разбирање.
„Она што е значајно е да имаме поглед кон иднината, а не да останеме заробени во прашања од минатото. Прашања поврзани со идентитетот, историјата и јазикот, бидејќи имаме иднина која треба да нѐ обедини“, порача Муцунски.
Тој нагласи дека секое идно унапредување на односите треба да биде засновано врз взаемна доверба, почитување и искрена соработка меѓу двете соседни држави.
„Треба да функционираме во систем кој ќе значи меѓусебна доверба“, истакна министерот.
Изјавата на Муцунски доаѓа во период кога прашањата поврзани со европската интеграција на Македонија и билатералните односи со Бугарија повторно се наоѓаат во фокусот на регионалната политичка јавност.
