Премиерот Христијан Мицкоски соопшти дека компанијата „Џаво Аутомотив“ ќе инвестира околу 20 милиони евра во Технолошко-индустриската развојна зона во Тетово, при што ќе бидат отворени до 412 нови работни места.
Технолошко-индустриската развојна зона во Тетово добива нов инвеститор, откако претходно пропадна еден од најавуваните проекти на тогашната власт предводена од СДС и ДУИ. Премиерот Христијан Мицкоски денеска соопшти дека компанијата „Џаво Аутомотив“ ќе инвестира околу 20 милиони евра и ќе отвори до 412 нови работни места.
Станува збор за глобална компанија од автомобилската индустрија со повеќе од четири децении искуство, која во Тетово ќе произведува автомобилски компоненти за светски познати производители. Според најавите, кога фабриката ќе работи со полн капацитет, годишниот извоз ќе достигнува околу 45 милиони евра.
Новата инвестиција доаѓа на локација која во изминатите години беше симбол на едно големо неисполнето ветување. Во август 2022 година, тогашниот прв вицепремиер Артан Груби и лидерот на ДУИ Али Ахмети свечено поставија камен-темелник на фабриката „Некст е.Го мобиле“, која требаше да произведува електрични автомобили во ТИРЗ Тетово.
Тогаш беа најавени инвестиција од 130 милиони евра и околу 900 нови работни места. Проектот беше претставуван како историска шанса за регионот и за македонската автомобилска индустрија. Според најавите, првите електрични автомобили требаше да излезат од производствените линии во 2024 година.
Но наместо фабрика и нови работни места, остана само поставениот камен-темелник. Германската матична компанија поднесе барање за несолвентност, а во 2024 година Дирекцијата на ТИРЗ го прекина договорот и сите постапки поврзани со државната помош за проектот.
Од ТИРЗ тогаш соопштија дека кон инвеститорот не биле исплатени државни средства, но проектот никогаш не беше реализиран, иако со месеци беше користен како пример за наводен економски развој.
Денес, наместо нови ветувања и спектакуларни најави, во ТИРЗ Тетово пристигнува конкретна инвестиција со јасен план за производство, извоз и нови вработувања. Останува да се види динамиката на реализацијата, но за разлика од претходниот проект, оваа инвестиција веќе влегува во фаза на практична имплементација.
За Тетово и Полошкиот регион тоа значи нова можност за економски развој, отворање работни места и дополнително зајакнување на индустриското производство во Македонија.