СДС ја прогласува намерата на Владата да набави авион за потребите на државата за непотребен луксуз, но молчи пред јавните прашања за криминалите, корупциите, марихуаната, државна лотарија, јахта, скап имот и златни визи во Дубаи поврзани со луѓе од неговото раководство,…
Слично беше и за време на „Шарената револуција“, кога владиниот „мерцедес“ беше претставуван како симбол на расипништво, а откако Зоран Заев седна во премиерската фотелја, истиот автомобил секојдневно го користеше за своите потреби.
За СДС, Македонија е „несериозна држава“ ако набави безбеден и современ авион што ќе остане државна сопственост како и мерцедесот и ќе им служи на институциите. Но кога се поставуваат прашања за приватни јахти, скап имот и златни визи во Дубаи, од „Бихаќка“ следува молк.
Евентуалната набавка, секако, мора да биде целосно транспарентна. Јавноста треба да ги знае цената, начинот на финансирање и постапката за избор. Но државен авион не е исто што и приватна јахта, како што државна инвестиција не е исто што и лично богатење.
Затоа, пред да дели лекции за „сериозна држава“, СДС треба да одговори што им вети на граѓаните, што исполни и какви последици остави по седум години власт.
Дали сериозна држава беше онаа во која се промени уставното име спротивно на волјата изразена на референдумот?
Дали сериозна држава беше онаа што го прифати бугарскиот протокол и отвори нови прашања за македонскиот идентитет, јазик и историја?
Дали сериозна држава беше онаа во која Специјалното јавно обвинителство, претставувано како симбол на правдата, заврши со скандалот „Рекет“ и со правосилно осудена специјална обвинителка Катица Јанева?
Дали сериозна држава беше онаа во која живи изгореа 14 луѓе во модуларната болница во Тетово, а јавноста пет години чекаше целосна одговорност?
Наместо целосно расчистување на трагедијата, јавноста доби судска нарачана одлука дека нема основа за кривична одговорност на поранешниот министер Венко Филипче, а како причина за пожарот повторно беше посочен електричниот спој на продолжен кабел. Останува прашањето: кој ја создал можноста болницата да биде изградена и пуштена во употреба со такви пропусти?
Токму затоа треба да се направи споредба меѓу седумгодишното владеење на СДС и првите две години од Владата предводена од ВМРО-ДПМНЕ.
СДС ветуваше живот, правда, повисок стандард и брз влез во Европската Унија, а зад себе остави променето име, прифатени бугарски услови, корупциски скандали, нефункционални институции и запрени проекти.
За само две години Владата предводена од ВМРО-ДПМНЕ покажа дека сериозноста на една држава се докажува со работа и резултати.
Што ветуваше СДС?
Во 2016 и 2017 година СДС им ветуваше на граѓаните „живот за сите“, правда, повисоки плати, чист воздух, квалитетно здравство, подобро образование и брз почеток на преговорите со Европската Унија.
Ветуваше дека нема да има промена на уставното име, дека македонскиот идентитет ќе биде заштитен и дека државата ќе добие независно судство, одговорни институции и бескомпромисна борба против криминалот и корупцијата.
По седум години власт, од големите ветувања останаа разочарување и горчливи последици.
Наместо „живот за сите“, десетици илјади граѓани ја напуштија Македонија. Наместо правна држава, јавноста сведочеше на корупциски афери, сомнителни тендери и партизација на институциите.
Наместо ветената заштита на името, СДС го потпиша Преспанскиот договор и го промени уставното име на државата. Наместо затворање на националните прашања, беше прифатен бугарскиот протокол, со што на патот кон Европската Унија беа внесени нови барања што ги засегаат македонската историја и идентитет.
Македонија стана членка на НАТО, но ветениот брз влез во Европската Унија не се оствари. И по сите направени отстапки, државата повторно остана пред нови услови и блокади.
Од ветената правда до СЈО и „Рекет“
СДС дојде на власт со поддршка од надворешни центри на моќ, „Шарената револуција“ „монтираните“ бомби и ветувања за независно правосудство, неселективна правда и бескомпромисна борба против криминалот.
Специјалното јавно обвинителство, предводено од Катица Јанева, беше претставувано како симбол на новата правна држава. Но институцијата што требаше да ја врати довербата во правосудството заврши со скандалот „Рекет“.
Катица Јанева од специјална јавна обвинителка стана обвинета, а потоа и правосилно осудена за злоупотреба на службената положба и овластување.
Наместо симбол на правдата, СЈО стана симбол на компромитацијата на правосудниот систем. Обвинителството што требаше да го гони високиот криминал беше вовлечено во еден од најголемите правосудно-политички скандали во Македонија.
Така заврши едно од главните ветувања на СДС: со згаснато СЈО, осудена специјална обвинителка и дополнително уништена доверба на граѓаните во правосудството.
СДС ветуваше дека „ќе нема недопирливи“, но во негово време Македонија се соочи и со афери поврзани со корупција, трговија со наркотични супстанции и издавање македонски патни исправи на меѓународни криминалци.
Затоа денешните лекции на СДС за „сериозна држава“ звучат уште понеубедливо.
Седум години порази и нефункционален систем
Во здравството зад владеењето на СДС останаа трагедијата во модуларната болница во Тетово, во која загинаа 14 лица, скандалот на Клиниката за онкологија и систем во кој пациентите сè почесто бараа спас во приватното здравство или во странство.
Во образованието недостигаа учебници, реформите се менуваа без јасен план, а учениците и наставниците беа претворени во заложници на експерименти.
Во инфраструктурата со години се зборуваше за автопатишта и железници, но проектите се одложуваа, поскапуваа или остануваа само на хартија. Автопатот Кичево–Охрид стана симбол на доцнење и неспособност.
Граѓаните се соочија и со хаосот со личните документи, долгите редици и дополнителните трошоци предизвикани од промената на името.
Тоа ли е „сериозната држава“ за која денес зборува СДС?
Што вети и што оствари ВМРО-ДПМНЕ?
Пред изборите ВМРО-ДПМНЕ вети економско заживување, раст на пензиите и платите, поддршка за општините, нови инвестиции, изградба на патишта, реформи во институциите и заштита на македонските национални интереси.
За само две години голем дел од ветеното е реализирано, а во повеќе области е направено и повеќе од најавеното.
Пензиите беа зголемени линеарно за 7.000 денари, со што најголема поддршка добија пензионерите со најниски примања. Платите продолжија да растат, а економијата повторно бележи реален раст.
За општините беа обезбедени околу 250 милиони евра за изградба на водоводи, канализации, училишта, градинки, улици, спортски објекти и други проекти што непосредно го подобруваат животот на граѓаните.
Владата соопшти и за рекордно ниво од над 1,25 милијарди евра странски директни инвестиции, нови фабрики, проширување на производствените капацитети и отворање нови работни места.
Македонија повторно стана големо градилиште
За разлика од годините на застој, денес истовремено се работи на шест автопатски делници. Забрзана е изградбата на коридорите 8 и 10, продолжуваат работите на автопатот Кичево–Охрид и се отвораат нови инфраструктурни проекти.
Се инвестира во железничко, енергетско и гасно поврзување. Гасниот интерконектор со Грција, далноводот Битола–Елбасан и другите стратешки проекти ја претвораат Македонија во важна инфраструктурна и енергетска крстосница на Балканот.
Во образованието се зголемени средствата за високото образование и науката, се реконструираат студентски домови и се подобруваат условите за учениците и студентите.
За две години беа отворени 28 нови авиодестинации, со што Македонија стана подобро поврзана со Европа и светот и се создадоа услови за привлекување илјадници нови туристи.
Две години работа наспроти седум години изговори
Разликата е очигледна.
СДС седум години ветуваше, а зад себе остави национални отстапки, политички поделби, корупциски сомнежи, институционален хаос и незавршени проекти.
Сериозна држава не е онаа што го менува сопственото име, прифаќа туѓи услови и потоа прогласува историски победи. Сериозна држава е онаа што ги штити своите интереси, гради, произведува, привлекува инвестиции и го подобрува животот на граѓаните.
СДС денес зборува за сериозна држава, но граѓаните добро се сеќаваат што ветуваше, што направи и колку несериозно управуваше со Македонија во текот на седумгодишното владеење.
