Европската комисија одобри нов пакет финансиска поддршка за земјите од Западен Балкан во рамките на Планот за раст, при што за Македонија се предвидени 65,7 милиони евра. Средствата се дел од пошироката европска стратегија за економско приближување на регионот кон Европската Унија и забрзување на реформските процеси.
Според информациите од Брисел, покрај Македонија, финансиска поддршка добиваат и соседните држави – 49 милиони евра за Албанија и 44,2 милиони евра за Црна Гора.
Со најновата исплата, вкупниот износ на средства што досега се ставени на располагање преку овој фонд достигнува 212,8 милиони евра за Албанија, 89,3 милиони евра за Црна Гора и 142,1 милиони евра за Македонија.
Планот за раст на Западен Балкан има за цел да поттикне економски развој, инфраструктурни инвестиции, реформи во правосудството, енергетиката и дигитализацијата, како и подобрување на животниот стандард на граѓаните. Европската Унија преку овој механизам сака постепено да ги интегрира економиите од регионот во европскиот пазар уште пред полноправното членство.
За Македонија, овие средства се очекува да бидат насочени кон реализација на реформските агенди и проекти кои ќе придонесат за побрз економски раст, модернизација на институциите и подобрување на конкурентноста на домашната економија.