СВЕТСКИ МАКЕДОНСКИ КОНГРЕС
29 март 2016 година, Солун, Грција
– Светскиот Македонски Конгрес (СМК) најостро протестира против Владата во Атина, која континуирано и грубо го попречува слободното движење на Македонци во Грција со алиби “опасни по националната безбедност“. На тој начин Грција ги прекршува членовите 8, 9 и 10 од Привремената согласност меѓу Македонија и Грција од 13 сепември 1995 година затоа што наметнува пречки во движењето на Македонците помеѓу териториите на двете држави или низ териториите на двете држави од територијата на Македонија.
СМК смета дека на тој начин Атина врши грубо кршење на принципите на демократијата, основните слободи, почитувањето на човековите права и достоинство и владеењето на правото во согласност со Повелбата на Обединетите Нации, Универзалната декларација за човековите права, Европската конвенција за заштита на човековите права и основните слободи, Меѓународната конвенција за елиминација на сите форми на расна дискриминација, Конвенцијата за правата на децата, Финалниот хелсиншки документ, Документот од копенхагенската средба на Конференцијата за човековата димензија на Конференцијата за безбедност и соработка во Европа и Париската повелба за нова Европа.
СМК оценува дека Атина го нарушува разбирањето и добрососедството помеѓу македонскиот и грчкиот народ и ги обесхрабрува средбите помеѓу македонските и грчките државјани што е спротивно на меѓународното право и обичаи.
СМК потсетува дека Атина го оневозможува влезот на сите Македонци кои ги третираат човековите права и слободи од Македонија и од сите држави каде што Македонците живеат независно од нивното државјанство!
Истовремено, СМК укажува дека Атина го оневозможува влезот на културно-уметнички друштва и естрадни уметници од Македонија и нивното учество на културни и други јавни манифестации и програми во Грција.
СМК апелира до Министерството за надворешни работи, Владата и Претседателот на Република Македонија да преземат соодветни реципроцитетни мерки пред Владата во Атина, Европската Унија и Обединетите Нации за заштита на правата на Македонците кои грчките власти ги попречуваат за влез во Грција со банално образложение “опасни по националната безбедност“, како грубо кршење на Привремената македонско-грчка согласност од 13 септември 1995 година.
