Генералниот секретар на ВМРО-ДПМНЕ и пратеник, Драган Ковачки, на денешната прес-конференција се заблагодари на десетиците илјади граѓани кои вчера присуствуваа на одбележувањето на 36-годишнината од формирањето на ВМРО-ДПМНЕ во Струмица, оценувајќи дека бил испратен силен сигнал за единство, заедништво и поддршка за политиките на партијата.
Ковачки истакна дека присуството на голем број граѓани на стадионот „Благој Истатов“ претставува потврда за довербата што ВМРО-ДПМНЕ ја ужива меѓу народот и мотив повеќе за продолжување на работата во интерес на државата и граѓаните.
„Во изминативе 36 години се соочивме со бројни предизвици, тешки моменти, неправди и разочарувања. Но секогаш кога некој мислеше дека сме ослабени, ние станувавме уште посилни. Токму народот и граѓаните беа и остануваат нашата најголема поддршка и двигател на нашата истрајност“, порача Ковачки.
Тој нагласи дека идејата на ВМРО, поставена пред 133 години, продолжува да живее преку ВМРО-ДПМНЕ како организација создадена од народот и за народот, додавајќи дека вредностите на ВМРО остануваат автентични, македонски и цврсто втемелени во стремежот за развој и просперитет на Македонија.
Осврнувајќи се на работата на Владата во изминатите две години, Ковачки посочи дека се реализирани бројни проекти и мерки кои, според него, придонесуваат за економски раст и подобрување на животниот стандард.
Тој потенцираше дека во државата се реализираат рекордни инвестиции од 1,255 милијарди евра, како и силен инфраструктурен циклус кој опфаќа изградба на нови автопати, експресни патишта и железничка инфраструктура. Дополнително, нагласи дека во наредната деценија се предвидени капитални инвестиции во вредност од 10 милијарди евра.
Ковачки посочи дека Владата инвестира и во младите преку реконструкција на студентски домови, доделување ваучери за електронски уреди и поддршка за започнување сопствен бизнис, како и преку мерки за зголемување на платите и пензиите.
„Градиме нови градинки, училишта, патишта, здравствени установи и спортски сали, а истовремено ги враќаме старите долгови наследени од минатото. Македонија денес има развој, проекти, надеж и јасна визија за иднината“, истакна Ковачки.
Тој нагласи дека ВМРО-ДПМНЕ нема да води политика на попустливост кога станува збор за националните интереси и дека останува цврсто посветена на заштитата на државните позиции.
На крајот од прес-конференцијата, Ковачки порача дека со мотото „Македонија забрзува, наша обврска“, ВМРО-ДПМНЕ ќе продолжи да работи на создавање посилна економија, повисок животен стандард, нови можности за младите и модерна Македонија која сигурно чекори кон својата европска иднина.
„Македонија се исправува чекор по чекор. Сега е време да забрза. Тоа е нашата обврска“, порача Ковачки.
