Во пресрет на разговорите за можни измени на Изборниот законик и други прашања поврзани со политичкиот систем, се наметнува потребата политичките партии најнапред да ги усогласат сопствените позиции.
СДС, Левица и ДУИ, кои во повеќе наврати настапуваат со различни, а понекогаш и спротивставени ставови, најпрво треба да се договорат што навистина предлагаат. Дали се залагаат за една изборна единица, дали го поддржуваат или го оспоруваат правото на македонските државјани во дијаспората полесно да го остваруваат своето избирачко право, како и кои се нивните конкретни предлози за изборните реформи.
Само со јасно дефинирани позиции може да се води суштинска и конструктивна политичка дебата, наместо јавноста да биде сведок на меѓусебно спротивставени пораки и дневнополитички пресметки.
Од друга страна, ВМРО-ДПМНЕ останува подготвено да разговара за секое прашање што е од значење за функционирањето на политичкиот систем, унапредувањето на демократските процеси, европската интеграција на Република Македонија и иднината на државата и сите нејзини граѓани.
Политичкиот дијалог треба да биде насочен кон изнаоѓање решенија што ќе ја зајакнат демократијата, ќе ја зголемат довербата во институциите и ќе обезбедат еднакви права за сите граѓани, вклучително и за македонските државјани кои живеат надвор од Македонија.
Наместо политички калкулации и меѓусебни несогласувања, граѓаните очекуваат одговорност, јасни позиции и подготвеност за конструктивен дијалог за сите прашања што се од национален и државен интерес.