Министерството за надворешни работи и надворешна трговија ги отфрли како невистинити тврдењата на СДС за постоење таен договор или тајни преговори, нагласувајќи дека Владата останува доследна на утврдените државни позиции и нема да прифати отстапки од македонските национални интереси, идентитетот, јазикот и историјата.
„Денешната прес-конференција на СДС е уште еден обид за создавање хистерија и дезинформирање на јавноста. Наместо да понесе одговорност и да се извини за штетата што ја нанесе врз националните и надворешнополитичките позиции на државата, СДС повторно пласира груби невистини и конструкции. Тврдењата за постоење таен договор или тајни преговори се само уште една во низата измислици што СДСМ ѝ ги пласира на јавноста“, се наведува во реакцијата на МНР.
Од Министерството посочуваат дека институциите редовно комуницираат со земјите членки на Европската Унија, европските институции, Бугарија и со другите меѓународни партнери.
„Овие разговори се водат транспарентно, а позицијата на Владата е јасна и повеќепати јавно потврдена. Нема отстапки од националните интереси, идентитетот, јазикот и историјата. Полноправното членство во Европската Унија останува стратешка определба и крајна цел на оваа Влада“, велат од МНР.
Според Министерството, токму во начинот на водење на надворешната политика се наоѓа суштинската разлика меѓу актуелната Влада и претходната власт.
„Во минатото, договори и компромиси се прифаќаа далеку од очите на јавноста и на штета на националните позиции. Денес надворешната политика се води одговорно, принципиелно и во согласност со националните интереси и волјата на граѓаните. Транспарентноста и доследната заштита на националните интереси се клучната разлика меѓу оваа и претходната власт“, се истакнува во реакцијата.
Од МНР оценуваат дека со ваквите настапи СДС се обидува да им се додвори на одредени политички кругови во соседството, наместо да ги брани интересите на сопствената држава и народ.
„Наспроти нивниот неодговорен пристап, Владата и Министерството постапуваат принципиелно и сите одлуки ги носат транспарентно, пред очите на јавноста и во согласност со јасно утврдените државни позиции“, се наведува во реакцијата на Министерството.
