Иван Трпоски
Македонскиот верски и национален празник Илинден традиционално се одбележува на 2 август во сите градови и држави ширум светот каде што живеат и работат Македонци.
Бидејќи Илинден е и национален и верски празник, Македонците најмасовно го одбележуваат во црковните храмови. Покрај богослужбите посветени на светиот пророк Илија, на свеченостите се говори за Илинденското востание од 1903 година и за Првото заседание на АСНОМ. Се оддава почит и на сите комити и партизани кои ги положиле своите животи за татковината Македонија, за таа да продолжи да опстојува слободна и обединета, а Македонците слободно да ги одбележуваат своите историски настани и да говорат на својот мајчин јазик.
Годинава, во црквата „Света Петка“ во Рокдејл, Сиднеј, беше отслужена света литургија, на која проповедаше свештеникот Владо Недески. Потоа отец Недески одржа панихида за паднатите борци кои ги положиле своите животи за Македонија.
Пред споменикот на апостолот на македонската револуционерна борба за слободна и обединета Македонија, Гоце Делчев, беа положени венци со свежо цвеќе.
Меѓу претставниците на повеќето друштва што дејствуваат во оваа општина, венец положија и членовите на Македонското литературно друштво „Григор Прличев“ од Сиднеј. Тие настапија и со патриотска поезија посветена на Илинден и на илинденците.
Во поетскиот дел од програмата со свои творби настапија поетите Марија Александрова, Иван Трпоски, Спасија Огненовска, Цане Долевски, Перо Илиевски и д-р Васил Тулевски.
Петре М. Андреевски
ЗА МНОГУ ГОДИНИ ИЛИНДЕН, МАКЕДОНЦИ
О, најдолга годино, ти збиру на нашата мака,
што ни го изнесе оружјето до секој горски срт,
чакалу и гаврану во предците што гракаш,
пронајди ме и мене во твојот прекар сакан:
СЛОБОДА ИЛИ СМРТ!
Окову што нè додржа со нашиот бол да патиш,
црна солзо врз пепелта преорана од крт до ’рт,
колку пушки ни испразни маката да ни ја сфатиш
и кој беше последен востанат што те испрати
со СЛОБОДА ИЛИ СМРТ!
Камбанаријо што смеша земја, небеса и води,
раскажи ни ја цената на твојот зарек грд,
преброј ни ги мртвите од кои ти се роди
и продолжи да нè водиш низ времето што нè сроди
со СЛОБОДА ИЛИ СМРТ!
О, штура свадбарино, припеку од сите рани светнат,
погоди ме и мене в срце со твојот лелек тврд,
погоди ме недоветно сред исто пладне летно
поради сите кои, умирајќи, ти пееја сетно:
СЛОБОДА ИЛИ СМРТ!
