Премиерот Христијан Мицкоски ги отфрли обвинувањата дека договорите за изградба на дата-центри се прават „под маса“. Тој порача дека секоја странска или стратешка инвестиција ќе биде јавно и транспарентно објавена, а откри дека Владата преговара со најмалку пет до шест потенцијални инвеститори.
„Според тоа што го коментира опозицијата, претпоставувам дека кај нив работи Фројд. Тие мислат дека, како што се однесуваа кон државата и граѓаните – лажејќи, ограбувајќи и понижувајќи ги – така се однесуваат сите“, истакна премиерот Христијан Мицкоски, одговарајќи на новинарско прашање за дата-центрите и обвинувањата на опозицијата дека договорите се прават „под маса“.
Мицкоски нагласи дека Владата нема намера ништо да прави тајно и дека тоа го покажала во изминатите 25–26 месеци.
„Добро знаете дека секоја странска инвестиција, како и секоја инвестиција што е прогласена за стратешка, ја објавуваме јавно и транспарентно. Тука не треба да има никаква дилема“, рече премиерот.
Според него, тврдењата што се пласираат во јавноста во последните неколку дена се невистинити и покажуваат непознавање на темата.
„Тоа што го слушам претставува целосна невистина, незнаење и непознавање. Понекогаш се срамам што луѓето што ги испраќаат овие пораки имаат политичка тежина и водат политички партии. Нема да навлегувам во суштината, бидејќи сметам дека не заслужуваат одговор на техничко ниво“, изјави Мицкоски.
Тој го нагласи значењето на вештачката интелигенција и дата-центрите за современиот економски развој.
„Замислете како денес би изгледал БДП на САД без вештачката интелигенција, податочните центри и дата-центрите. Зарем ‘Амазон’, ‘Спејс икс’, ‘ОпенАИ’ и другите мултинационални компании, чии брендови вредат илјадници милијарди, би постоеле доколку на каков било начин го доведуваат во прашање квалитетот на животот на граѓаните?“, праша премиерот.
Мицкоски посочи дека Владата останува посветена на стратегијата што предвидува изградба на гасни централи за производство на електрична енергија, која потоа би се користела за потребите на дата-центрите.
Во однос на проектот во Пехчево, премиерот појасни дека станува збор за приватна иницијатива и предлог-нацрт на урбанистички план, во кој државата во оваа фаза не учествува.
„Тука државата нема ништо. Кога државата ќе реализира проект или ќе преземе институционален ризик за изградба на таков објект, јавно и транспарентно ќе излеземе пред јавноста. Преговараме со најмалку пет до шест потенцијални инвеститори, меѓу кои има и голема мултинационална компанија, и нема да отстапиме ниту милиметар“, порача Мицкоски.
Премиерот на крајот оцени дека опозициските политичари, критикувајќи сè што е добро за граѓаните и за економскиот развој, покажуваат дека не ја сакаат сопствената држава.
