Премиерот на Република Македонија, Христијан Мицкоски, оствари средба со Македонците од Туминец, Преспа и Мала Преспа, испраќајќи силни пораки за национално единство, зачувување на македонскиот идентитет и поддршка за македонскиот народ надвор од татковината.
Посетата на премиерот Мицкоски беше по повод отворањето на споменикот посветен на хероите од село Туминец, загинати во Втората светска војна, како и во чест на Македонец осуден на 101 година затвор за време на османлиското владеење во Македонија.
Во своето обраќање пред Македонците во Мала Преспа, премиерот истакна дека на Македонија денес повеќе од кога било ѝ е потребно обединување околу националните интереси, иднината на младите генерации и почитта кон сопствената историја и достоинството на народот.
„Да се обединиме околу националните интереси. Околу иднината на нашите деца. Околу почитта кон сопствената историја и достоинството на народот. Нашите предци не се делеа кога ја бранеа слободата. Не прашуваа кој од каде е, ниту кој на кого припаѓа. Сите стоеја под едно име – Македонија“, порача Мицкоски.
Тој нагласи дека Македонците во Албанија се нераскинлив дел од македонското национално ткиво и дека нивната истрајност низ децении претставува подвиг достоен за почит.
„Вашата истрајност низ децениите е подвиг достоен за почит. Вие го сочувавте македонското име, јазикот, традицијата и духот и тогаш кога било најтешко. И затоа денес сакам јасно да порачам: Матицата нема да ве заборави. Македонија стои со својот народ каде и да е, со почит, со грижа и со искрена поддршка“, истакна премиерот на средбата со Македонците од Туминец, Преспа и Мала Преспа.
Средбата помина во духот на заедништво, национално достоинство и пораки за зачувување на македонскиот јазик, традиција и културно наследство меѓу Македонците кои живеат надвор од границите на Македонија.
Селото Туминец се наоѓа на падините на Пречна Планина, на брегот на Преспанско Езеро, на северниот брег на заливот Залив Завир.
