По повод Денот на трудот (Labour day) во австралиската држава Викторија, секоја година се одржува спектакуларниот Мумба фестивал. Фестивалот кој за прв пат започнал да се одржува во 1955 година, трае 4 дена со 400 разновидни претстави, активности за деца и младинци. Зборот Мумба (земен од Абориџинска тв серија) во превод значи ‘Ајде сите да се дружиме‘. Емигрантите кои се доселиле на австралискиот континент имаа можност да го слават нивното културно наследство отсликано преку разнобојните традиционални костими и музички кореографии.
Како и секоја година така и оваа, круна на овој фестивал беше Мумба парадата во која учествуваа над 2000 учесници. Меѓу нив секако беше и македонскиот претставник, ансамблот “Тоше Проески“ со презентација на македонскиот фолклор и традиција.
Многу е важно за Македонската заедница во Викторија да зема учество во што повеќе културни збиднувања во Мелбурн и да презентира дел од македонската култура пред 100 илјадната мелбурнска публика.
Eден од играорците на “Тоше Проески“, Даниел Димитријевски изјави: “Нас ни претставуваше голема чест да бидеме учесници на најголемиот Мумба фестивал во Австралија. Парадата е многу добро организирана, пренесувана во медиумите и одлично прифатена од австралиската публика. Посебно се радуваме што оваа година ние ја претставуваме Македонската заедница на Викторија. Многу убаво поминавме, бевме изненадени од интересот на публиката за нашата кореографија, музика, песна и културата воопшто. Многу од нашите за првпат настапуваа на Мумба и со големо задоволство би настапиле повторно“.
Атмосферата на Мумба имаше силен ефект на нашите чувства и за сите нас е просто неопишливо. Ако некој друг има прилика да присуствува, би рекле: “искористете ја можноста затоа што е незаборавен и настан за паметење“.
Гордана Димовска
