Македонската православна црква „Свети Кирил и Методиј“ во Чикаго е духовно собиралиште на македонските иселеници и место за зачувување на православната вера, македонскиот јазик и традициите од татковината.
Во далечната 1979 година, Македонците од Чикаго го направиле првиот поголем чекор кон остварувањето на својот сон – купиле постара црква во Бервин, Илиноис, и веднаш започнале со нејзино преуредување.
На едно од црковните собранија одлучиле храмот да го носи името на светите просветители и учители Кирил и Методиј. Црквата била осветена во 1988 година.
И во туѓина, како што вели отец Рубинчо, се негуваат истите обреди и обичаи како во татковината:
„Свештениците настојуваат да ги одржат традициите на Македонската православна црква. Децата на младите христијани се крштаваат во нашата црква за да бидат прифатени во христијанската заедница. Православната црква се збогатува со нови членови со самото крштевање во овој купел.“
Македонските православни цркви во САД се изградени со цел да ја зачуваат верата и да ги продолжат традициите на македонските иселеници. Литургии се одржуваат секоја недела и за празниците, а според сведоштвото на отец Рубинчо, бројот на членовите на заедницата расте од година во година.
„Ширењето на православната вера е наследно. Ние настојуваме да ја одржиме таа вера кај нашите доселеници и поколенијата кои доаѓаат на овие простори. Настојуваме да градиме љубов спрема својата црква, како и спрема нашата татковина“, истакнува отец Рубинчо.
Во своето сведоштво, тој ја нагласува и поддршката од надлежниот архиереј за северноамериканскиот континент, владиката Методиј, кој со посети два-три пати годишно ги охрабрува верниците да продолжат со својата мисија – зачувување на македонскиот јазик и православната вера.
