Македонското литературно друштво „Григор Прличев“ пред 30 години го издаде зборникот поезија „Видици“ и со тоа ја започна својата издавачка дејност во Австралија. За овој период се имаат објавено повеќе од седумдесет наслови, а со тоа се вбројува како најголем македонски издавач во дијаспората.
Иако литературното друштво веќе постоеше неколку години и редовно го издаваше своето списание „Повод“, членовите имаа голема желба да се започне со издавачка дејност на книги од самите членови. Тој сон се оствари во 1984 година кога професорот д-р Ѓорѓи Сталев престојуваше во Сиднеј како професор во размена. Во овој период исто така Д-р Сталев припреми и издаде три учебници наменети за потребите на Македончината за изучување на мајчиниот јазик. После првото издание на „Видици“ во кое беа вклучени 31 поети од Австралија следеше и второто дополнително издание во 1988 година во кое беа застапени 36 поети. Второто издание се издаде во Скопје преку издавачот Современост. За неизмерната помош што професорот Сталев му ја даде на Литературното друштво тој беше прогласен за почесен член на истото, а со тоа стана и неразделен член, потпомагател, рецензент и ментор.
Ете овие беа бурните дискусии што ги имав со професорот Сталев при посетата во неговиот гостопримлив дом во Скопје во 2014 година. Се присетивме на дружењето и работењето во Друштвото „Григор Прличев“, припремањето на песните и издавањето на зборникот како и припремање на десетина други рецензии за книгите што следеа и се издадоа. Тука беше неговиот внук, сопругата и неговата 102 годишна мајка. Беше воодушевен од работата на Друштвото и долгогодишната издавачка дејност посебно од можноста за последните три децении да биде дел од она што го твориме во дијаспората. При разделбата ми ја наполна торбата со негови книги за Библиотеката „Григор Прличев“ со желба да се шири и негува македонскиот јазик во Австралија.
Душан Ристевски
