Австралиско македонскиот театар од Сиднеј од 4 до 14 јуни со драмата „Борење со мечка“ настапи во градовите Скопје, Велес, Штип, Струмица, Прилеп, Битола и Охрид и истата беше гледана од повеќе од 1600 луѓе. Сите телевизиските канали во споменатите градови ги следеа претставите при што следуваа репортажи и оценки за значењето и улогата што ја има оваа театарска група во Австралија и пошироко. Социјалната мрежа беше преполна со фотографии и изјави на видни културни дејци кои дадоа високи критички осврти за драмата и артистите. Турнејата беше организирана од Агенцијата за иселеништво, а главен покровител беше Macedon Travel од Сиднеј.
Пред самата турнеја театарот беше гостин кај директорот на Агенцијата за иселеништво Васил Наумов, при што се организира и прес конференција за турнејата и улогата на театарот што ја завзема во зачувување на македонскуиот јазик и култура.
Турнејата започна во Скопје, на 4-ти јуни, во Драмскиот театар каде приемот беше фантастичен. Меѓу гостите присуствуваше и легендарната Виолета Томовска, новинарката Фиданка Танаскова, артистот Ванчо Петрушески, поетесата Марина Мијаковска и други видни личности од Скопје како и директорот на Драмски, Роберт Вељановски.
Приемот во Велес, родниот град на Ирена и Сашко Вељанови, беше возбудлив каде директорот и актер Јордан Витанов направи да се чувствуваме како дома. Театарот беше до последно место полн и се јави барање за втора претстава но следниот ден требаше да се настапува во Штип.
Штипјани се покажаа како најгостопримливи. После претставата, директорот на театарот „АцоШопов“, поетот и драмски критичар Трајче Кацаров со Биљана Костова од Агенцијата за иселеништво ни приредија вечера, а Штип вриеше од гости, истата вечер беше финалната вечер на Макфест, но тоа не ги спречи Штипјани да уживаат во нашата претстава. Следниот ден по покана на драмскиот уметник и писател Доне Донев од Кочани на кафе и чај отидовме покрај езерото во Градче. Времето беше кратко но Доне успеа да ни долови со неговиот патриотски дух и да ни го опише ликот на Ченто што го игра во неговата најнова монодрама. За ручек бевме поканети во домот на најславниот Штипјанец, историчарот и нашиот драг пријател Александар Донски кој со својата сопруга Загорка успеа да не смести во неговиот прекрасен стан и да ни го сервира штипскиот специјалитет Пастрмајлија. Тука се сретнавме и со професорката Марија Кукубајска со која разменивме книги и трајни контакти.
Пред настапот во Струмица, градот на најславниот македонски поет Никола Маџиров, театарската група го посети манастирот Воведение на Пресвета Богородица Елеуса, кој се чини ги заштитува Струмичани и струмичките полиња. Средбите со директорот Драган Маџиров, драмскиот писател Митко Бојаџиски, поетот – новинар Ѓорги Калајџиев, фотографот Среќко Гунчев беа незаборавни.
Во Прилеп, учеството на 49-тиот театарски фестивал „ВојданЧернодрински“ беше највозбудлив настап. Се настапи во 24 часот но времето за прилепчани не прави разлика, за време на фестивалот не се спие, се слави и се гледаат прекрасни претстави. Средбата како и секогаш со уметничкиот директор на фестивалот Петре Темелковски и неуморниот секретар Стојан Дамчески само дава мотивација да се негува македонскиот исконски јазик и култура. Средбите секогаш се возбудливи со легендарните лица во театарот, Братислав Димитров, Васе Манчев, Мустафа Јашар, Валентин Светозарев…
Во Битола домаќини ни беа Центарот за култура и директорот Борче Димитровски со Љупка и Валентин, а вечерта претставата официјално ја отвори новиот пратеник на ВМРО-ДПМНЕ од Австралија Г-дин Васко Наумовски кој беше присутен со неговата сопруга. Битолчани како и секогаш се покажаа дека се големи љубители на театарот и оваа престава беше најпосетена покрај тоа што Широк сокак во лето секогаш е во фестивалски џагор.
Во Охрид енергичната директорка на Културниот центар „Григор Прличев“, Драгана Боцеска, покажа дека е вистински двигател на културниот живот во Охрид, градот под Самоиловата тврдина и поетскиот гениј Григор Прличев. Средбата со Професорот Стојан Ристески, поетот Пере Ристески и новинарите Милчо Јованоски и Томче Џамтоски беше исполнета со желба повторно да се дојде во прекрасниот Охрид и настап во античкиот театар за време на Охридско лето.
Ова е втора турнеја во Република Македонија на овој Театар кој за последните седум години од своето постоење има ставено на сцена шест оргинални-автентични претстави за кои во Австралија е и наградуван.
Душан Ристевски
