На 25.3.2024 година, во просториите на црквата „Свети Илија“ од Квинбијан, Нов Јужен Велс (Австралија), се одржа промоција на романот „ Жална Македонија“, од писателката Велика Џангаловска Гатсис, која е по потекло од Македонија. Таа долги години живее во Австралија, но и покрај тоа го негува мајчиниот македонски јазик и писмо, па сите нејзини поеми, раскази и романи ги пишува на македонски јазик. Промоцијата беше организирана од членовите на Литературното Друштво „Ванчо Николески “ и нивниот претседател господинот Наум Трајчески.
Промоцијата започна во 12 часот, точно напладне, каде господинот Јовица Ѓоргоски ја отвори промоцијата. Тој со неговиот опширен говор ја запозна публиката со содржината на романот, во кој писателката го опишува животот на младата селанка наречена Калеша, која живее во втората половина на 19 век, во времето кога владееле Османлиите во нашата земја Македонија. Од содржината на овој роман на едноставен начин доаѓаме до сознание кои сме, што сме и до каде сакаме да одиме за да бидеме признат народ во светот. Салата беше полна со посетители, меѓу кои, освен од Квинбијан, имаше гости дури и од Сиднеј, Мелбурн и Канбера.
Краток говор одржа и македонската амбасадорка од Канбера, госпоѓата Билјана Стефановска Сековска. Промоцијата беше мошне успешна, а доказ за тоа беше и продажбата на многу примероци од романот. По промоцијата следуваше богат ручек со печено прасе што го подготвија домаќинките и членовите на Литературното Друштво „Ванчо Николески“ од Квинбијан.
Многу од посетителите кои од претходно го имаа прочитано романот, дадоа предлог да се направи негово продолжение, т.е. втор дел.
Македонска нација
