Александар ДОНСКИ
Легендата ја раскажувал Дане Тонев (1898 – 1993) од штипското село Пиперово, а јас ја запишав од неговиот внук Симе Тонев (род. 1968), кој ми ја раскажа така како што ја запомнил од својот дедо, кој пак ја запомнил од своите предци. Според оваа легенда еден голем македонски цар во далечното минато загинал во Мала Азија. Но, неговата мајка успеала некако да го украде неговото тело и сокриено во голема амфора во мед, го донела кришум на Зелената планина. Притоа мајката цело време неутешно плачела по својот син. Наредила да го погребаат според традиционалните обичаи на некоја тајна локација, а потоа приредила гозба за сите што учествувале во погребувањето. На гозбата во виното им ставила отров, така што сите биле убиени, па местото на погребувањето останало тајна. Поради неутешното плачење на мајката на царот, Зелената планина подоцна го добила името Плачковица.
Дане Тонев раскажувал дека од своите предци запомнил дека локацијата на гробот наводно била близу самиот врв на планината (денес познат под името Туртел). Тој раскажувал дека порано Плачковица и навистина се викала Зелена планина заради богатото зеленило што го содржела.
Дане Тонев раскажувал уште една легенда овој пат за своето село Пиперово (на дваесетина километри од Штип). Над ова село порано имало тврдина од која денес се зачувани остатоци. Тоа место до денес се викало „Филипово око“, а среде селото имало могила (која патем да спомнеме официјално е заведена во археолошката карта на Македонија), во која наводно бил закопан некој древен војсководец сосе својата златна кочија.
Иако во првата легенда не се спомнува името на Александар, јасно е дека истата се однесува на него, а слично е и со називот на локалитетот „Филипово око“, кој несомнено е поврзан со царот Филип Втори, за кого е познато дека немал едно око.
