КОЛУМНА НА АНГЕЛОВСКИ:Комунизмот е мртов, а вие?
Патувајќи кон еден од најубавите македонски предели, пиринскиот, прочитав графит кој беше директно прашање за оние кои уште ни ги поткопуваат државите, графит краток и јасен – “Комунизмот е мртов, а вие?“
Ова ме потсети на оние кои деновиве се јавуваат со изјави во врска со државно-криминалната операција “Рекет“, во обид да ја извитоперат вистината и да ни ја продадат лагата како реалност. Тоа се луѓе кои ги замрзнале сопствените умови во времето од далечната 1945-та, свесни дека на тогашните удбашки злосторства им должат се што постигнале во животот. На злосторствата што ги извршиле нивните татковци и дедовци. Свесни дека злосторството со кое беше ликвидиран Ченто, злосторството со кое беа ладнокрвно убиени петмината струмички студенти, грозоморното злосторство кога со токмак во глава беа ликвидирани пеесетмината велешани, злосторството од скопското Кале, се нивната влезница во живот со власт, богатство и привилегии. Влезница во повеќе од седумдесетгодишното битисување на цели семејства, од генерација во генерација, во светот на предавствата, измамите, злосторствата, омразата кон Македонија и се македонско.
Па така, еден од нив ќе се обиде да ве убеди дека целта на објавувањето на овој државно криминален чин била, замислете, да се поткопа угледот на актуелната власт; друг ќе рече дека целта била да се уништи СЈО; третиот го крева на повисоко рамниште, па ве убедува дека крајната цел била да се спречи добивањето датум за преговори; за некој, конечно, посочувајќи го порталот во кој бил објавен исказот за “Рекет“, срамежливо да ја најави и руската вмешаност.
И, навистина би било смешно, доколку не е удбашки монструозно. Истите конструкции, лаги и измами како во 45-та. Ами, зарем треба некој да го поткопува угледот на актуелната власт, доколку таа самата не го прави тоа со учество во операцијата “Рекет“? Зарем треба некој да го уништува СЈО доколку тоа не го прави токму првиот човек на тоа СЈО рекетирајќи бизнисмени и политичари? Зарем треба некој да го спречува добивањето на датумот за преговори доколку тоа не го прави актуелната власт и правосудниот систем со криминалната спрега во операцијата “Рекет“? И, на крајот, зарем навистина мислите дека е потребна “руска врска“ за да се откријат криминали тешки милиони и милиони евра?
Но, од умови заробени во сопственото удбашко минато и не можете да очекувате нешто повеќе. Затоа и го поставив прашањето во насловот на текстов – „Комунизмот е мртов, а вие?“
Е, сега, следејќи ги сите овие случувања, неминовно се поставува прашањето зошто ќе мора да се бара поништување на договорот од Преспа?
Во моментов, во државава имаме три категории на граѓани во однос на овој договор. Првата категорија се големото мнозинство на граѓани кои ниту го прифатија, ниту го прифаќаат, ниту ќе го прифатат овој договор, со право сметајќи го за антицивилизациски и уништувачки за Република Македонија и македонскиот народ.
Втората категорија се оние партиски послушници на СДСМ кои или навистина се убедени во исправноста на овој договор, со што си ја навредуваат сопствената интелигенција, или ја гледаат неговата суштина, но го поддржуваат заради свои лични интереси, со што ги навредуваат сопствените предци и се она што постоело пред нив.
Третата категорија се оние граѓани кои надевајќи се дека евентуалниот влез во НАТО и во Европската Унија би го подобрил животот за нив и за нивните деца, што е сосема човечки и оправдано, поверуваа во лагите дека промената на името и бришењето на македонското постоење, се единствениот услов за тоа. Токму таа категорија граѓани е онаа која мора да сфати дека измамничка била реториката на актуелната власт и дека токму таа и таква власт учествувала во промената на името заради свои лични интереси (можеби изразени во милиони евра), а не заради интересите на граѓаните и државата. Ќе мора да сфати дека потпишувањето на договорот не се случило заради НАТО и ЕУ перспективите, колку и да се и самите тие сомнителни, туку за да се ограбат државата и нејзините граѓани. Како поинаку да се протолкува ситуацијата кога таа власт, преку политичко-правосудно-криминалната операција “Рекет“ бесрамно ги поткопува сите можности за државава и за нејзините граѓани и ги затвора сите подотворени вратички за нејзин брз напредок. Таа категорија граѓани, осознаена за она што како измама им го продаде актуелната власт, ќе мора да ни се придружи во барањата за поништување на антицивилизацискиот преспански договор. Таа категорија граѓани ќе мора да ни се придружи и во уривањето на оваа антимакедонска власт, како прв чекор кон повторно отворање на вратите за брз напредок на Република Македонија и нејзините граѓани.
Кога кон сето ова ќе се додаде и докажаното нелегитимно и незаконски формирано парламентарно мнозинство, со што и Владата формирана од тоа мнозинство ја добива својата нелегитимност, барањето за поништување на Преспанскиот договор ќе ја добие својата целовитост бидејќи договорот е потпишан од нелегитимни претставници на државата Република Македонија.
Затоа, кога правото, она домашното, но и меѓународното, ќе го заземе своето место наместо злосторничките двојни стандарди кои, за жал, го владеат светот, македонскиот народ ќе си дојде по своето. По правото и правдата за себе и, по одговорноста и казната за сите домашни и меѓународни учесници во антицивилизациското злосторство против Република Македонија и македонскиот народ.
И тогаш, ќе ги запрашаме – “двојните стандарди се мртви, а вие“?
(авторот е претседател на МААК)
https://denesen.mk/kolumna-na-angelovski-komunizmot-e-mrtov-a-vie/
