Македонска Нација
8-ми септември пред 35 години беше остварен вековниот сон на генерации Македонци, празник што достоинствено го слави секој Македонец, каде и да се наоѓа – во татковината или низ светот.
На 8 септември 1991 година граѓаните на Македонија излегоа на референдум и ја изразија својата волја за самостојна и суверена држава. Над 95 проценти од оние што гласаа позитивно одговорија на референдумското прашање:
„Дали сте за суверена и самостојна држава Македонија, со право да стапи во иден сојуз на суверени држави на Југославија?“
Тоа историско „ДА“ не беше само одговор на едно референдумско прашање. Тоа беше гласот на македонските поколенија, одек на вековната борба за слобода и потврда на непокорот на еден народ кој никогаш не се откажал од правото да биде свој на своето.
Остварување на вековниот македонски сон
На референдумот му претходеше Декларацијата за сувереност на Република Македонија, усвоена од првото повеќепартиско Собрание на 25 јануари 1991 година. Волјата изразена од граѓаните беше потврдена со Декларацијата за прифаќање на референдумските резултати, донесена во Собранието на 18 септември 1991 година.
Референдумот беше демократска потврда на вековната борба на македонскиот народ за сопствена држава – борба која во минатото се водела со пушка, крв, саможртва и непресушна вера во слободата.
Одлуката за независност претставува возвишен историски чин и непроценливо наследство за сегашните и за идните генерации. Со неа се исполни сонот на безброј Македонци кои живееле, се бореле, погинале со името Македонија во срцето.
Создавањето независна држава дополнително ги зацврсти македонската национална свест, чувството на припадност и врската со сопствените корени. Зашто, како што вели народната мудрост – дрво без корен не бидува.
Три и пол децении исполнети со предизвици
Во изминатите 35 години Македонија се соочи со бројни тешкотии, блокади и обиди за дестабилизација. На почетокот од деведесеттите години земјата се справуваше со економска неизвесност и висока инфлација, но и со последиците од распадот на југословенската федерација.
Следуваа грчките блокади, косовската бегалска криза, конфликтот во 2001 година, мигрантската криза од 2015 година, политичката нестабилност и кумановските настани. Секој од овие предизвици претставуваше сериозна закана за безбедноста, стабилноста и иднината на државата.
Но Македонија опстана. Опстана благодарение на мудроста и трпението на граѓаните, на цврстината на македонскиот народ и на неговата подготвеност да ја брани државата создадена со многу жртви.
Во изминатите децении беа направени и крупни политички грешки, од кои некои оставија трајни последици врз македонското национално достоинство.
Државното знаме беше сменето во 1995 година, во време на влада предводена од СДС. Законот за новото знаме беше изгласан на 5 октомври истата година.
Во 2017 година беше потпишан Договорот за пријателство, добрососедство и соработка со Бугарија. Наместо да ги затвори отворените прашања, по неговото потпишување следуваа нови барања, условувања и притисоци поврзани со македонската историја, јазик и идентитет.
Една година подоцна беше потпишана Преспанската спогодба, која стапи во сила на 12 февруари 2019 година и доведе до промена на уставното име на Република Македонија.
Најтешкото наследство од владеењето на СДС, според тоа, не се само незавршените градилишта, пропуштените можности и неисполнетите ветувања. Уште потешки се одлуките што длабоко го повредија македонското национално достоинство.
Поради тоа, СДС денес тешко може уверливо да се претставува како заштитник на македонските национални и економски интереси. Токму во периодите кога оваа партија ја имаше власта беа донесени некои од најтешките и најштетните одлуки во поновата македонска историја.
Македонија повторно се гради
Новата стратегија на Владата предводена од ВМРО-ДПМНЕ го менува амбиентот во државата. Македонија повторно станува градилиште, се привлекуваат инвеститори, се создаваат нови работни места и се отвораат можности за младите.
Се градат патишта и нови капацитети, се обновуваат болници и се реализираат проекти што треба да им служат и на денешните граѓани и на идните поколенија.
По долг период на застој, повторно се враќа надежта дека Македонија може да напредува, да ја развива својата економија и да создаде услови младите да останат во својата татковина.
Сепак, ниту една влада и ниту една политичка партија не може сама да ја изгради државата. За успех се потребни национално единство, одговорност и заедничка посветеност кон интересите на Македонија.
Само сплотени можеме да одиме напред
Денот на независноста – 8 Септември е празник со кој го одбележуваме раѓањето и го славиме опстојувањето на независна и суверена Република Македонија.
Тоа е ден на гордост, но и ден за сумирање на резултатите. Ден кога треба да се запрашаме што направивме за државата што ни ја оставија претходните генерации и каква Македонија ќе им оставиме на нашите деца и внуци.
Изминаа 35 години во кои македонските граѓани покажаа мудрост, истрајност и сила. Македонија докажа дека е способна да се справува со проблемите и да чекори напред, дури и кога на нејзиниот пат се поставуваат политички и надворешни пречки.
Историјата нè научи дека само кога сме сплотени, како на 8 септември 1991 година, можеме да ги одбраниме националните интереси, да ги постигнеме поставените цели и да изградиме подобра иднина за сите граѓани.
Да ја чуваме Македонија, зашто таа не ни е подарена. Таа е создадена со вековна борба, платена со жртвите на најдобрите македонски синови и ќерки и оставена како свет аманет на идните поколенија.
Нека ни е честит и вековит Денот на независноста – 8 Септември!
Да живее независна, суверена и вечна Република Македонија!
