Македонските граѓани би можеле да добијат бесплатен роаминг во земјите на Европската Унија од 1 јануари 2027 година, доколку процесот биде одобрен и финализиран од страна на европските институции.
Ова го изјави министерот за дигитална трансформација Стефан Андоновски, кој посочи дека Македонија веќе ги завршила своите обврски и ја усогласила регулативата со европските директиви.
Според Андоновски, најоптимистично сценарио е граѓаните на Македонија да можат да користат мобилни услуги во ЕУ без дополнителни трошоци уште од почетокот на 2027 година, но конечната одлука и роковите зависат од Европската Унија и од динамиката на преговорите со земјите од Западен Балкан.
Министерот нагласи дека Македонија е меѓу земјите кои навремено ги исполниле техничките и законските предуслови за приклучување кон европскиот модел „роаминг како дома“.
Законските измени веќе биле испратени до Европската комисија за мислење, а паралелно се водат и подготовките за претстојните преговори.
Доколку процесот биде успешно завршен, македонските граѓани при патување во земјите членки на Европската Унија би можеле да користат телефонски разговори, СМС-пораки и мобилен интернет по исти цени како во Македонија, без дополнителни роаминг-трошоци.
