Фондот на холокаустот на Евреите од Македонија (ФХЕМ) и Еврејската заедница во Република Македонија (ЕЗРМ) добија благодарници за донацијата на Светиот крст од Ерусалим за црквата „Света Огнена Марина“ во Зубовце.
Светиот крст е донесен од Ерусалим и осветен на Каменот на Помазанието во храмот на Светиот Гроб – едно од најсветите места во христијанството. Со свеченото предавање, тој беше подарен на црквата и доверен на нејзино трајно чување, како духовно богатство и благослов за сегашните и идните поколенија.
Патот на Светиот крст носи и силна историска порака. Од Светиот Гроб во Ерусалим до Скопје го донесоа потомците на Рафаел Камхи евреин од Битола – македонски револуционер и илинденец, близок соработник на Гоце Делчев и Даме Груев, кој со своето дело останал трајно запишан во македонската историја. На тој начин, патувањето на крстот ги поврзува христијанската вера, македонското револуционерно наследство и долгогодишното заедништво меѓу Македонците и Евреите.
Светиот крст беше пречекан од голем број верници, жители на Зубовце, гости од соседните села и пријатели од цела Македонија. На возвишениот духовен настан присуствуваа поглаварот на Македонската православна црква – Охридска архиепископија, Архиепископот Охридски и Македонски г. г. Стефан, Митрополитот Тетовско-гостиварски г. Јосиф, како и бројни свештенослужители.
Ова не е прва поддршка од ЕЗРМ и ФХЕМ за Зубовце. Во една од претходните иницијативи, тие беа меѓу донаторите на значителни средства наменети за доизградба на детско игралиште, уредување на црковниот двор и изградба на летниковци во дворот на црквата „Света Огнена Марина“.
При посетата на нивните претставници на Зубовце, во знак на пријателство беа засадени две јапонски цреши, два чемпреса и два кедра. Дрвјата и денес го красат црковниот двор, останувајќи жив симбол на пријателството, солидарноста и заемната почит меѓу заедниците.
Донацијата на Светиот крст претставува продолжение и своевидно крунисување на оваа долгогодишна соработка. Од детското игралиште, уредениот двор, летниковците и засадените дрвја, па сè до оваа голема христијанска светиња, ЕЗРМ и ФХЕМ оставаат трајни материјални и духовни белези во Зубовце.
Доделените благодарници се израз на длабока признание за нивниот благороден гест и несебичната поддршка. Донацијата истовремено претставува силен пример за меѓурелигиски дијалог и покажува дека верата, човечноста и заемната почит можат да ги поврзат луѓето и да создадат трајни пријателства.
Светиот крст отсега ќе биде нераскинлив дел од духовниот живот на црквата „Света Огнена Марина“ и траен симбол на верата, заедништвото и пријателството.
Овој чин ќе остане запишан во историјата на Зубовце како сведоштво дека добрината, дарувањето и љубовта кон ближниот се посилни од сите разлики.
