Премиерот Христијан Мицкоски најави дека со помош на екипи од скопскиот водовод и експерти се работи на целосно прочистување на системот, со цел водата повторно да биде безбедна за граѓаните на Гостивар.
Ако биде сѐ како што треба, бидејќи се вклучија екипи од скопски водовод и експерти, јас очекувам до крајот на оваа недела да имаме технички исправна вода во Гостивар.
Сега треба да се пристапи кон целосно перење на системот за да може да добиеме вода која што ќе има нормални граници на хлор и која што ќе биде добра за техничка употреба. Планот е кон крајот на идната недела таа вода да биде добра и за пиење – изјави Мицкоски.
Премиерот нагласи дека надлежните институции продолжуваат со интензивни активности на терен, оценувајќи дека состојбата во Гостивар претставува сериозен предизвик, но дека Владата ќе направи сѐ што е во нејзина моќ за што побрзо да се нормализира водоснабдувањето.
Работиме и таму. За жал, таа летаргија која што ја зафати општината после овој случај претставува предизвик за сите нас, но тоа е што е. Иако тоа не е во ингеренции на Владата, ние како Влада ќе сториме сѐ што е во наша моќ час поскоро да профункционира системот и повторно да се стави во употреба – истакна Мицкоски.
