Венко Филипче, исто како и поранешниот премиер Зоран Заев во своето време, се обидува да ги убеди граѓаните дека уставните измени без јасни гаранции се прифатливи и дека нема простор за загриженост во однос на иднината на државата и нејзиниот европски пат, реагираат од ВМРО-ДПМНЕ.
Од партијата потсетуваат дека Заев користеше слична реторика кога ги промовираше измените поврзани со името на државата, уверувајќи ја јавноста дека тоа е последниот чекор кон членството во Европската Унија.
„Наместо ветениот напредок, Македонија се соочи со нови блокади, нови вета и дополнителни условувања од Франција и Бугарија. Денес Филипче ги повторува истите аргументи и ја застапува истата политика на СДС – политика на отстапки без гаранции“, наведуваат од ВМРО-ДПМНЕ.
Според партијата, Филипче не нуди конкретен одговор на прашањето како би се спречиле идни блокади и вета, ниту како би се обезбедила сигурност дека државата повторно нема да биде соочена со нови условувања во евроинтегративниот процес.
„Уставните измени поврзани со промената на името беа спроведени од СДС и ДУИ со ветување дека тоа ќе го отвори патот кон ЕУ. Денес, наместо напредок, Македонија се наоѓа во позиција на блокирана преговарачка рамка и постојани билатерални спорови“, се наведува во реакцијата.
Од ВМРО-ДПМНЕ истакнуваат дека членството во Европската Унија останува стратешка цел на државата, но додаваат дека тоа не смее да биде оправдување за нови отстапки без јасен исход и без заштита на националните интереси.
„Нема да дозволиме повторно СДС и Венко Филипче да ја газат волјата на граѓаните. Националните интереси мора да бидат заштитени, а секој следен чекор на евроинтегративниот пат треба да биде заснован на јасни гаранции и предвидлив процес“, велат од партијата.
Во реакцијата се додава дека Филипче работи на исполнување на туѓи агенди и се обидува преку прифаќање на барањата на Бугарија да дојде до власт, посочувајќи дека јавно најавува подготвеност веднаш да ги спроведе уставните измени.
„Македонија заслужува достоинствен европски пат, без нови условувања и без нови отстапки. Граѓаните заслужуваат одговорна политика која ќе ги брани државните позиции и ќе обезбеди сигурна и предвидлива иднина“, порачуваат од ВМРО-ДПМНЕ.
