Венко Филипче седми ден престојува на јахтата на поранешниот премиер Зоран Заев, од каде што на СДС му дава насоки да шири хистерија и лажни вести за водата во Скопје, обвинуваат од ВМРО-ДПМНЕ.
„Каде е Венко Филипче? Тој седми ден е на одмор на јахтата на Зоран Заев, а на 6 август со својот мотор ја напуштил Македонија преку граничниот премин Богородица. СДС го крие тоа од јавноста. Зошто се срамат да кажат дека нивните двајца лидери се на заеднички одмор?“, прашуваат од партијата.
„Претходно водеа лажна кампања и беа против прославата на независноста на Македонија“, се наведува во соопштението.
Партијата изнесува обвинувања и во врска со протестите на струмичките производители на пиперки. Според ВМРО-ДПМНЕ, Филипче и Заев од јахтата на Егејското Море го нарачувале штрајкот, манипулирајќи со незадоволството поради ниските откупни цени и со фирмата за производство на ајвар „Мамас“.
„Сè на сè, плоден одмор: шират лаги за водата, се против независноста и ги уценуваат земјоделците“, порачуваат од ВМРО-ДПМНЕ.
