Македонска Нација
На одбележувањето на 36 години од формирањето на ВМРО-ДПМНЕ, од Струмица беше испратена силна патриотска, државничка и обединувачка порака: Македонија повторно има надеж, повторно има сила и повторно има народ кој верува во себе.
Претседателот на ВМРО-ДПМНЕ и премиер, Христијан Мицкоски, во својот говор порача дека овој јубилеј не е само прослава на една политичка партија, туку сведоштво за една идеја што трае повеќе од еден век – идејата за слободна, достоинствена и силна Македонија.
„Вечерва не сме собрани само да одбележиме 36 години од формирањето на ВМРО-ДПМНЕ. Вечерва сме собрани да покажеме дека идејата која започна пред 36 години, не само што опстана, туку денес е посилна од кога било. Таа идеја, тој наш сон отсекогаш бил и ќе остане Македонија“, порача Мицкоски.
Од Струмица, пред присутните членови, симпатизери и поддржувачи, беше нагласено дека ВМРО-ДПМНЕ е многу повеќе од партија. Тоа е име со тежина, име вградено во македонската историја, име кое носи спомен на борба, жртва, вера и љубов кон татковината.
Мицкоски потсети дека ВМРО-ДПМНЕ не е партија без корен, туку политичка организација која го носи историскиот континуитет на ВМРО – од 1893 година, преку Илинден, преку сите премрежија, прогони, поделби, жртви и воскреснувања на македонската идеја.
Во својот говор тој зборуваше за Гоце Делчев, Даме Груев, Ѓорче Петров, Пере Тошев, Јане Сандански, Христо Татарчев, Тодор Александров и сите генерации кои низ историјата ја носеле идејата за Македонија како своја најголема должност.
„Секој член на ВМРО-ДПМНЕ мора да биде свесен за историскиот габарит кој го носи ова име“, истакна Мицкоски, додавајќи дека ВМРО низ историјата секогаш се враќала посилна кога некој мислел дека е поразена.
Особено емотивен дел од говорот беше посветен на основачите на ВМРО-ДПМНЕ од 17 јуни 1990 година. Мицкоски им се заблагодари на сите кои со храброст, визија и љубов кон Македонија ја создадоа најголемата политичка партија во државата.
„Патот до 17 јуни од Голгота се претвори во воскреснување на светиот идеал на историската ВМРО“, порача тој.
Во говорот беше испратена и силна порака за македонскиот идентитет, јазик, култура, традиција и историја. Мицкоски нагласи дека нема пазарење со македонскиот идентитет и дека Македонија има место во Европската Унија, но не по цена на достоинството.
„Нема цена, нема слава, нема моќ која може да ме убеди дека без овие работи ќе прифатиме било што. Ова е нашата црвена линија. Нема пазарење со идентитетот наш македонски. Доста беше“, порача Мицкоски.
Тој истакна дека правилата мора да важат за сите, потсетувајќи и на пресудите на Европскиот суд за човекови права за правата на Македонците кај источниот сосед.
Мицкоски зборуваше и за работата на Владата, наведувајќи дека Македонија прави сигурни чекори напред, иако проблемите наследени од претходната власт се големи и длабоки. Тој порача дека нема магично стапче, но има работа, посветеност и одговорност.
Во говорот беа спомнати економскиот раст, странските инвестиции, изградбата на автопати, зголемените пензии, студентските домови, електронските уреди за студентите и проектите што повторно се движат напред.
Посебна порака беше испратена и до функционерите: власта не е привилегија, туку служба на народот. Мицкоски најави реконструкција на Владата и порача дека нема да има толеранција за недостапност, ароганција и заборавање на народот.
„Ние сме овде да му служиме на народот. Чистиот образ тешко се одржува, а лесно се губи“, рече Мицкоски.
На крајот, говорот прерасна во силна национална порака за иднината. Македонија, како што беше истакнато, не смее да биде држава на изговори, туку држава на можности; држава што создава, што работи, што верува во себе и што оди напред.
„Македонија не застанува. Македонија не се предава. Македонија забрзува“, порача Мицкоски.
Од Струмица беше испратена порака дека народот е буден, исправен и решен. Дека кога народот е обединет, нема пречка што не може да се совлада, нема врв што не може да се достигне и нема сон што не може да се оствари.
„Нека се слушне силно од Струмица! Од Беласица до Шар Планина! Од Охрид до Делчево! Од Гевгелија до Куманово! Една татковина! Една заедничка иднина!
Да живее ВМРО-ДПМНЕ!
Среќен роденден ВМРО-ДПМНЕ!
Бог да ја благослови Македонија!
