Владата предводена од ВМРО-ДПМНЕ постигнува конкретни резултати на меѓународен план, додека СДС останува заробен во политиките на отстапки и редефинирање на македонските национални позиции, истакна Валентин Манасиевски.
Портпаролот на ВМРО-ДПМНЕ, Валентин Манасиевски, оцени дека серијата дипломатски успеси што ги постигнува Владата предводена од ВМРО-ДПМНЕ претставуваат доказ за активна и успешна надворешна политика, но воедно и причина за нервоза кај СДС.
Тој посочи дека претседателот на Европскиот совет, Антонио Кошта, за време на посетата на Македонија испратил јасна порака за напредокот на државата во исполнувањето на Реформската агенда. Како потврда за тоа, Македонија доби 65,7 милиони евра од Планот за раст на Европската Унија, што, според Манасиевски, е за околу 50 проценти повеќе во споредба со средствата што ги добиле Црна Гора и Албанија.
Манасиевски потсети и на изборот на Македонија за членка на Економскиот и социјалниот совет на Обединетите нации (ЕКОСОК) за периодот 2027–2029 година, оценувајќи го како историски успех на македонската дипломатија и прв таков успех од независноста на државата.
Тој истакна дека позитивни пораки за Македонија содржи и Нацрт-извештајот на Комитетот за надворешни работи на Европскиот парламент, во кој државата е препознаена како европски партнер посветен на реформите, регионалната стабилност и стратешкото партнерство со Европската Унија и НАТО.
„Имаме заедничка изјава со Европската Унија во делот на одбраната и безбедносната политика, успешно е завршен постмониторингот со Советот на Европа, а Македонија склучи стратешки договори со Унгарија, Хрватска, Обединетото Кралство и САД“, нагласи Манасиевски.
Осврнувајќи се на односите со Бугарија, тој посочи дека по долг период на, како што рече, потчинување и пасивност на претходната влада предводена од СДС, актуелната Влада го ратификувала договорот за реализација на Коридорот 8, проект кој има значење за регионот и за Европа.
„Додека едните се сликаа по автопатите и склучуваа штетни договори, ВМРО-ДПМНЕ работи на евроинтеграциите преку конкретни резултати и државнички пристап кој денес е препознаен и поздравен од бројни европски функционери“, истакна Манасиевски.
Според него, токму затоа СДС не ги признава овие успеси и настојува да ги минимизира.
„На СДС им пречи секој дипломатски успех на Владата предводена од ВМРО-ДПМНЕ. За нив единствен успех би бил отворањето на прашањето за уставни измени и прифаќањето на услови кои, според нивните политички ставови, водат кон редефинирање на македонската историја и национален идентитет“, порача Манасиевски.
