Талогот од СДС со ниту еден пакет вода не им помогна на гостиварчани, а сега безобразно лаже додека Владата обезбедува бесплатна вода за жителите на Гостивар, изјави Манасиевски од ВМРО-ДПМНЕ.
„Колку злоба и неискреност има во СДС, кога дрско се обидува да прикаже дека постојат некакви бизнис-интереси со водата што Владата бесплатно им ја дели на гостиварчани.
Талогот во СДС размислувал каква лага да искреира и да пласира, па измислил дека Владата прави бизнис со компанијата ‘Кожувчанка’. Вистината е дека Владата преку тендер ја избира компанијата која водата ѝ ја продава по двојно пониска цена од пазарната – само 12,5 денари за шише од литар и половина. Тоа е одлука на компанијата да биде општествено одговорна и да не заработува од кризата во Гостивар.
Очигледно е дека талогот од СДС мисли единствено на валкан профит и се обидува да создаде скандал таму каде што сè е чисто како солза.
Тоа е мочуриштето од кое произлезе предавничкиот талог од СДС и токму затоа ја нема довербата од граѓаните“, рече Манасиевски.
Одговарајќи на новинарско прашање за обвинувањата на СДС дека наводно се создава терен за прифаќање на францускиот предлог, Манасиевски оцени дека „хистеријата во СДС е на завидно ниво“.
„Талогот од СДС веќе не знае што повеќе да излаже. Со години лажеа дека државата ќе банкротира во 2024, а потоа и во 2025 година. Сега сме во 2026 година, не банкротиравме, а тие повторно лажат дека ќе банкротираме и годинава.
Лажеа и за програмата ИПАРД – дека ќе биде блокирана и дека парите нема да бидат наменети за земјоделците, но и таа лага се распрсна како меур од сапуница.
Лажеа и за мигрантите. Велеа дека ќе пристигнат во март, април, мај или јуни. Сега сме во август, а нема ни трага ни глас од какви било мигранти врз основа на договорот со Обединетото Кралство.
Лажеа и за извештајот на европратеникот Томас Вајц, а денес слушаме дека ние, наводно, ќе го прифатиме францускиот предлог. Во Собранието имаме двотретинско мнозинство. Доколку сакавме да го направиме тоа, веќе ќе го направевме и немаше да чекаме толку долго.
Да резимирам – сè што говори талогот од СДС е сосема спротивно на вистината“, изјави Манасиевски.
