Портпаролот на ВМРО-ДПМНЕ, Валентин Манасиевски, на денешната прес-конференција обвини дека во дел од македонското правосудство постојат двојни аршини и побара законот да важи еднакво за сите.
„За кубење коса се добиваат четири години затвор, за кражба на 150 ќебапи три години, а за Ласкарци, Модуларната болница и случајот Мазут – одговорност нема“, изјави портпаролот на ВМРО-ДПМНЕ, Валентин Манасиевски.
Тој оцени дека ваквите примери покажуваат двојни стандарди во дел од македонското правосудство, за кое ВМРО-ДПМНЕ тврди дека и натаму е под влијание на структури поврзани со СДС и ДУИ.
Манасиевски потсети дека во автобуската несреќа кај Ласкарци загинаа 16 лица, а во пожарот во модуларната болница во Тетово животот го загубија 14 лица. Тој го посочи и случајот „Мазут“, за кој наведе вредност од 167 милиони евра.
„За обичниот граѓанин важи законот, а кога ќе се стигне до луѓето и интересите поврзани со СДС и ДУИ, нивните инсталации во правосудството веднаш се ставаат во нивна заштита. Тоа е правдата што ја оставија и ветуваа СДС и ДУИ“, рече Манасиевски.
Според него, токму ваквото постапување е една од причините за недовербата на граѓаните во правосудниот систем.
„Не може за ќебапи да има три години затвор, а за случаи со десетици изгубени човечки животи граѓаните со години да чекаат конечна правда и истата да не ја дочекаат“, порача Манасиевски.
Тој нагласи дека правосудството мора да функционира независно и еднакво кон сите, без оглед на политичката или друга припадност.
„Правосудството не смее да биде штит на СДС и ДУИ. Законот мора да важи еднакво за сите“, порача портпаролот на ВМРО-ДПМНЕ.
