Министерот за надворешни работи и надворешна трговија Тимчо Муцунски вели дека Владата работи на трајно и одржливо решение за одблокирање на евроинтеграциите, но нагласува дека тоа нема да биде решение по секоја цена.
Министерот за надворешни работи и надворешна трговија Тимчо Муцунски, во интервју за МИА, изјави дека се работи на решение за одблокирање на европскиот пат на Македонија, но дека деталите од разговорите не можат да бидат објавени за да не се доведе во прашање нивниот успех.
Тој порача дека граѓаните треба да бидат спокојни бидејќи Владата јасно го следи нивниот став, има утврдени црвени линии и знае за кои прашања не е подготвена да преговара.
– Работиме на решение, но не на решение по секоја цена и не на решение што нема да биде одржливо и што ќе создава ризик повторно да се најдеме во ситуацијата во која сме сега – изјави Муцунски.
Нема преговори за идентитетот, јазикот, историјата и културата
Муцунски нагласи дека разликата меѓу сегашната и претходните влади е во тоа што актуелната Влада не е подготвена на попустливост за прашањата поврзани со македонскиот идентитет, историјата, јазикот и културата.
– Од првиот момент по формирањето на Владата во 2024 година работиме на решение, бидејќи немаме луксуз да чекаме некој друг да ги реши предизвиците поставени пред нас. Не е праведно постојано да се соочуваме со билатерални пречки, но тоа е реалноста со која мораме да се справуваме – рече тој.
Според Муцунски, доколку таканаречениот француски предлог бил доволно јасен и добар, денес немало да постојат различни толкувања за обврските што Македонија треба да ги исполни.
– Дел од луѓето што денес се на раководни позиции во бугарската надворешна политика биле на функции и во тој период и добро паметат што им било ветувано – истакна министерот.
Од ЕУ пристигнуваат и поинакви пораки
Муцунски посочи дека од високи претставници на земјите членки на Европската Унија се слушаат и поинакви пораки – дека кон Македонија треба да се преземат дополнителни обврски со кои ќе се гарантира предвидливоста на нејзиниот европски пат.
– Работиме за создавање систем во кој конечно ќе имаме предвидливост на европскиот пат. Мораме да бидеме објективни и да признаеме дека слушаме поинакви пораки од високи претставници на земјите членки на ЕУ, според кои треба да се преземат дополнителни обврски кон нашата држава – рече Муцунски.
Осврнувајќи се на критиките дека државата стагнира во евроинтеграциите, тој изјави дека опозицијата има право да критикува, но дека во областа на надворешната политика треба да преземе одговорност за грешките направени за време на нејзиното владеење.
Според него, попустливоста во 2021 и 2022 година ја довела Македонија во сегашната положба.
– Во надворешната политика треба да им се извинат на граѓаните за грешките што ги направија во седумгодишниот период на владеење и да дадат безрезервна поддршка за враќање на позициите на државата – нагласи Муцунски.
Македонија ќе продолжи со реформите
Министерот оцени дека Македонија во последната година постигнала значителен напредок во спроведувањето на реформската агенда, што, како што рече, го потврдуваат и оценките на Европската комисија.
Тој посочи дека државата добива средства преку Планот за раст врз основа на спроведените реформи, но призна дека остануваат предизвици во владеењето на правото, реформата на правосудството и јавната администрација.
– Владата ќе работи на создавање најдобри можни услови за правосудството, во делот на финансирањето, кадровското зајакнување и донесувањето на потребните закони. Но, успехот зависи од сите чинители во системот – изјави Муцунски.
Според него, Македонија е целосно усогласена со заедничката надворешна и безбедносна политика на ЕУ и е првата земја од регионот што потпишала партнерство за одбрана и безбедност со Унијата.
– Точно е дека останува предизвикот со Бугарија. Додека работиме на негово решавање, Македонија ќе продолжи да биде најдобриот можен кандидат за членство – додаде тој.
Ќе продолжат средбите со Бугарија
Муцунски најави дека Македонија ќе продолжи проактивно да иницира средби со бугарските претставници, пред сè за отворање и решавање на билатералните прашања.
Тој потсети дека ја иницирал првата средба со бугарската министерка за надворешни работи Велислава Петрова, одржана во Шведска, на маргините на состанокот на министрите за надворешни работи на земјите членки на НАТО.
– Во следните месеци ќе има повеќе можности за средби во различни мултилатерални формати. Ќе работиме со европските партнери за да се најде решение, но повторувам – не решение по секоја цена – рече Муцунски.
Преговори за американската „Виза вејвер“ програма
Во интервјуто Муцунски информираше дека на средбата во Вашингтон со заменик-државниот секретар на САД, Кристофер Ландау, било разговарано за почнување преговори за вклучување на Македонија во американската програма за безвизно патување – „Виза вејвер“.
– Тоа не е процес што се случува преку ноќ, туку станува збор за повеќегодишни преговори. Веќе ја подготвуваме работната група што ќе ја застапува Македонија и очекуваме во блиска иднина да ги почнеме официјалните разговори – изјави тој.
Нови амбасади и конзулат во Корча
Муцунски најави дека до крајот на годината Македонија ќе отвори две нови амбасади – во Литванија и во Саудиска Арабија.
Амбасадата во Литванија се отвора поради значењето на оваа држава во Балтикот и нејзиното претстојно претседавање со ЕУ, додека амбасадата во Саудиска Арабија ќе биде насочена кон зајакнување на стратешката, економската и трговската соработка.
Во Корча, пак, ќе биде отворен македонски конзулат поради потребите на македонското национално малцинство во Албанија.
Министерот најави и дека кон крајот на август, по подолг период, во Скопје ќе се одржи амбасадорски совет, на кој ќе присуствуваат сите македонски амбасадори и генерални конзули.
Муцунски во септември ќе го придружува премиерот Христијан Мицкоски на Генералното собрание на Обединетите нации, каде што премиерот ќе ја предводи македонската делегација.
