Коалицијата МАНАПО – Македонски национално-патриотски организации, реагира на изјавите на Велизар Енчев, поранешен бугарски разузнавач, кој во гостување во подкаст со Зорница Илиева изнесе сериозни тврдења за односот на Бугарија кон Македонија и нејзиниот пат кон Европската Унија.
Според изнесеното, Енчев смета дека членството на Македонија во ЕУ би било „голем удар“ за Бугарија, бидејќи со тоа македонскиот национален идентитет би добил уште посилна меѓународна институционална потврда.
Тој отворено говори дека Бугарија не треба да дозволи Македонија да стане членка на Европската Унија, бидејќи, како што вели, „македонизмот“ е длабоко вкоренет, особено кај младите генерации, и станува сè посилен.
Особено загрижувачки се деловите во кои се зборува за продолжување на блокадите, економско слабеење на Македонија, иселување на населението и можност за користење на внатрешни етнички тензии како средство за дестабилизација.
Овие изјави треба сериозно да ги слушнат Венко Филипче и целата СДС. Токму ваквите пораки покажуваат дека проблемот не е во Македонија, туку во политиките кои сакаат да го негираат македонскиот идентитет, јазик и историско право на постоење.
Македонија не смее повторно наивно да влегува во процеси без јасни гаранции. Не смее да се прифаќаат уставни измени, отстапки и диктати кои не носат сигурна европска иднина, туку отвораат простор за нови уцени.
Изјавите на Енчев, бараат внимателна проверка, но и јасна политичка, правна и морална реакција. Повиците за блокада, слабеење и дестабилизација на една држава не се европски вредности, туку спротивност на сè што Европската Унија треба да претставува.
Македонија има право на свој идентитет, свој јазик, своја историја и своја иднина. Тоа право не може да биде предмет на трговија, уцена или политички инженеринг.
