Во историјата на секоја држава и на секој народ, секоја генерација има свои предизвици и борби. Така е и со Македонците и со македонската држава.
Претходните генерации се бореа за слободна и самостојна држава. Борбата започна со славното Илинденско востание во 1903 година и Крушевската Република, а продолжи со Вториот Илинден и Првото заседание на АСНОМ во 1944 година.
Новата генерација политичари има поинаква, но не помалку тешка обврска и задача – да ја зачува Македонија силна, да ја направи економски просперитетна и праведна и повторно да ја претвори во земја во која луѓето ќе веруваат дека вреди да се остане, да се работи, да се создава, да се основа семејство и да се гради иднината дома, во сопствената татковина.
И оваа битка е подеднакво тешка, бидејќи не се води само надвор, туку и дома. Во државата постојат политички структури кои, за да дојдат на власт, се подготвени да распродадат сè што останало од националните обележја, односно она што нивните претходници не успеале да го распродадат.
Додека чекаат некој да ги донесе на власт во замена за нови предавства, наместо да се натпреваруваат со идеи, концепти и предлози, тие создаваат хистерија, шират лаги, омраза и дефетизам. Тврдат дека државата нема да успее и дека единствениот излез за младите генерации е билет во еден правец.
Им порачуваме дека ВМРО-ДПМНЕ никогаш нема да се откаже од борбата Македонија да стане подобро место за живеење, заеднички дом за сите и држава со иднина. Народот нема повторно да биде разочаран, ниту, по која било цена, ќе бидат прифатени отстапки од националните и идентитетските прашања на евроинтегративниот пат.
Ги повикуваме граѓаните да не паѓаат во замката што ја создаваат оние кои сакаат да дојдат на власт преку предавства, наместо со победа на избори и натпревар на добри идеи и програми. Ним не може да им се верува, бидејќи на секој успех на државата гледаат со цинизам и омраза.
Обврска на сите нас е заеднички да го вратиме достоинството на чесниот и родољубив човек, да ја обновиме вербата во институциите, да ја зачуваме душата на Македонија и надежта повторно да ја направиме најсилна движечка сила на нашето општество.
Денес не се води само економска борба за повеќе инвестиции и подобри услови за живот. Се води и борба против домашните предавници и злонамерници, како и против отровот што го шират истите луѓе кои секој викенд се на јахти, договараат и се нудат за нови отстапки. Заедно со напатениот народ ќе ги спречиме во нивните намери.
Битката за иднината на младите е одлучувачка. Затоа ќе се избориме да изградиме држава во која законите ќе важат еднакво за сите, во која одлучно ќе се води борба против криминалот и во која трудот ќе се цени, а младите нема да бидат принудени да заминуваат.
ВМРО-ДПМНЕ нема да дозволи омразата и песимизмот да станат национална идеологија. Заедно со народот ќе останеме исправени, обединети и достоинствени“, се наведува во соопштението на ВМРО-ДПМНЕ.
