Во вчерашното издание на емисијата „Анализа“ на Телевизија 24 гостуваше Ружица Николовска, член на Правната комисија на ВМРО-ДПМНЕ, која во реплика на Ленче Ристоска се осврна на начинот на кој функционирало СЈО, неговото постапување во текот на истрагите и односот кон осомничените. Николовска потсети и на постапувањето во предметите поврзани со корупција.
„Вие секојдневно излегувавте на јавни пресови и објавувавте кривични пријави, помпезно, спектакуларно, и сега ми кажувате да ја прашам Катица Јанева. Знаете како изгледаа претреси кај осомничените, како да се апсеа терористи од највисок можен ризик. Доаѓате на сослушување и вас ви се смешка обвинителот. Во покана не пишувавте во кое својство го повикувате лицето. Вие бевте дел од тоа СЈО“, рече Николовска.
Според неа, СЈО е пример за селективна правда, а посочи и на поврзаноста на Ристоска со Катица Јанева и ѝ постави прашање колку предмети за политичка корупција биле успешно решени.
„Вие зборувате за транспарентност, за високи корупции, а не сакате да признаете како постапувавте. СЈО е најголемиот неправен парадокс. Вие бевте како институција и ја имавте Катица Јанева на чело. Сите зборуваат дека вие бевте десна рака на Катица Јанева. Освен селективната правда, да не речам целосна неправда, што ја испорачавте, апсолутно ништо друго не се испорача, ниту еден успех“, посочи Николовска и додаде:
„Постапувањето на СЈО е резултат на сите овие работи. Катица и вие бевте едно исто, за која корупција зборувате? Колку предмети решивте за политичка корупција?“
Николовска: ДЗР утврди дека СЈО исплаќало плати и надоместоци спротивно на закон
„Дали може да ни објасните за бонусите кои ги земавте од СЈО и додатоци за тајност? Јас тоа го прашувам од еден друг аспект, бидејќи јас исто така водев еден предмет кај што беше гонета одредена особа за исто такви некои додатоци, надоместоци и тоа од обвинител исто, нели, постапува од СЈО, којшто притоа од она што беше пласирано во медиуми. Јас не знам, не тврдам дека биле земани бонуси, односно додатоци за тајност. За мене како адвокат, читајќи го и Законот за јавно обвинителство и Законот за Специјалното јавно обвинителство, па сметам дека една од основните работи во постапувањето на секој јавен обвинител е точно да ги чувате податоците до коишто дошол во своето работење и да не ги изнесува“, изјави Ружица Николовска, член на Правната комисија на ВМРО-ДПМНЕ, во гостување во дебатната емисија „Анализа“ на 24 ТВ.
Николовска се осврна на работата на поранешното СЈО, односно постапувањето за предмети од висока корупција, потенцирајќи дека „според конечниот извештај за извршена ревизија на усогласеност на плати и надоместоци и други надоместоци во СЈО, каде што токму за овој додаток се утврди дека во тој период, да не згрешам, од јануари 2016 до септември 2019 година, точноста на пресметките, евидентирањето и исплатата не се во согласност со релевантната законска регулатива.
Дали е ова во ред?“
Николовска нагласи дека според ревизорскиот извештај за усогласеност на плати и надоместоци и други надоместоци во СЈО, како што кажа, во периодот 2016–2019 година, точноста на пресметките, евидентирањето и исплатата не биле во согласност со релевантната законска регулатива. Таа додаде дека СЈО ги чинело граѓаните и оваа држава милионски суми, без конкретни испорачани резултати.
„Овдека, од она што се читаше, од она што беше достапно во јавноста, се зборуваше за навистина огромни суми. СЈО ги чинеше граѓаните и оваа држава милионски суми за нешто што не се испорача, значи нула резултат“, рече Николовска.
