Поради зголемената опасност од шумски пожари, движењето во шумите и шумското земјиште ќе биде дозволено само со писмено одобрение од надлежните институции.
Министерството за земјоделство, шумарство и водостопанство ја извести јавноста дека, согласно насоките од Владата и барањата од корисниците на шумите – ЈП „Национални шуми“ и националните паркови кои управуваат со заштитените подрачја, е дадена согласност за воведување целосна забрана за движење во шумите и шумското земјиште.
Согласноста се издава согласно член 57, став 3 од Законот за шумите, поради зголемената опасност и потребата од превенција од појава на шумски пожари на отворен простор.
Целосната забрана за движење во шумите започнува на 1 јули 2026 година и ќе трае до 31 август 2026 година.
Во наведениот период, движењето во шумите ќе биде дозволено единствено со писмено одобрение, издадено од подружниците на ЈП „Национални шуми“ или од националните паркови, во зависност од подрачјето со кое тие управуваат.
Од Министерството апелираат граѓаните да ја почитуваат забраната, имајќи ја предвид зголемената опасност од пожари во летниот период, кога високите температури и сувата вегетација значително го зголемуваат ризикот од ширење на огнот.
За непочитување на целосната забрана за движење во шумите и шумското земјиште, на физички лица кои ќе бидат затекнати да се движат во шума или шумско земјиште, согласно член 106 од Законот за шумите, ќе им биде изречена глоба од 1.500 до 2.000 евра во денарска противвредност.
