Пратеникот од редовите на ВМРО-ДПМНЕ, Љупчо Пренџов, гостуваше во емисијата „Само вистина“ на Канал 5, каде што говореше за Изборниот законик и работната група која функционира во рамки на Министерството за правда под покровителство на министерот.
Пренџов истакна дека СДСМ е единствената политичка партија што ги напуштила преговорите, оценувајќи дека тоа претставува недржавотворен потег на штета на граѓаните и угледот на државата.
„Она што не можам да се изначудам е дека де јуре сте полни со Европа и европски вредности, а ништо немате направено за да нè доближите до Европа. Во процесот за Планот за раст, каде како опозиција сте вклучени преку Изборниот законик, вие сте единствената политичка партија што ги напушта преговорите“, рече Пренџов.
Тој посочи дека во работната група учествуваат и партии кои, како што рече, немаат толкава ориентација кон ЕУ и Брисел како СДСМ, додавајќи дека опозициската партија бара алиби преку прашањето за техничката влада.
„Тоа е една од недржавотворните одлуки што моментално ги носите на сметка на граѓаните и угледот на Република Македонија. На Венко Филипче каприцот нема да му биде исполнет со техничката влада и сите реформи ќе ги завршиме навреме“, истакна Пренџов.
Тој додаде дека минатата година Република Македонија била првата држава од Западен Балкан што ги завршила реформите поврзани со Брисел и Планот за раст.
„Први ги добивме средствата, од кои две третини се нискокаматни кредити, а една третина грантови од Европската Унија. И оваа година повторно ќе бидеме меѓу првите и ќе реализираме 90 проценти од задачите“, изјави Пренџов.
Според него, СДСМ треба да биде информиран за текот на преговорите, бидејќи процесот трае со месеци, а нивни претставници активно учествувале до пред неколку состаноци.
„Има големи поместувања и се работеше согласно препораките на ОБСЕ и ОДИХР, но ова антидржавно однесување и повлекување поради каприци ќе им го оставам на граѓаните да го оценат“, заклучи Пренџов.
