Пратеникот од ВМРО-ДПМНЕ, Петар Ристески, во емисијата „Анализа“ на Телевизија 24 изјави дека годинава нема да има предвремени парламентарни избори и дека владејачката партија останува фокусирана на реформите, евроинтеграциите и реализацијата на инфраструктурните проекти.
Според Ристески, приоритет на Владата е исполнување на реформската агенда и обврските кон европските партнери, а редовните парламентарни избори ќе се одржат во 2028 година.
„Оваа година дефинитивно нема да има предвремени парламентарни избори, бидејќи ова е реформска година во која треба да го испорачаме она што сме го ветиле пред граѓаните и она на што сме се обврзале во делот на евроинтеграциите и реформската агенда. Редовните избори се во 2028 година. ВМРО-ДПМНЕ секогаш е подготвено за избори, бидејќи голем дел од ветувањата веќе се реализирани“, изјави Ристески.
Тој посочи дека во изминатиот период Владата реализирала значителен дел од предизборната програма, при што ги издвои зголемувањето на пензиите, колективните договори во здравството и образованието, како и инфраструктурните проекти низ државата.
„Пензиите беа зголемени во два наврати – прво за 5.000 денари, а потоа за дополнителни 2.000 денари, односно вкупно за 7.000 денари. Потпишани се и колективни договори со синдикатите во здравството и образованието, што предвидува раст на платите до 60 проценти до 2028 година. Паралелно се реализира и инфраструктурен бум низ целата држава“, нагласи Ристески.
Тој додаде дека Владата предводена од ВМРО-ДПМНЕ останува целосно посветена на реализација на ветените проекти, реформите и продолжување на евроинтегративниот процес.
