СДС и Венко Филипче очигледно ги вознемирува секој дипломатски успех на Македонија. Наместо да се радуваат кога државата бележи напредок, тие реагираат со нервоза, затоа што не сакаат да признаат дека Македонија може да успее и без политика на понижување, коленичење и прифаќање туѓи диктати.
Дипломатскиот успех на Владата предводена од ВМРО-ДПМНЕ во Скопје го потврди и претседателот на Европскиот совет, Антонио Кошта, кој испрати јасна порака дека Македонија има опиплив напредок во исполнувањето на Реформската агенда.
Овој напредок дополнително беше потврден и со добивањето на 65,7 милиони евра од Планот за раст, што е за 50 проценти повеќе од средствата што ги добија, како што често ги нарекуваат, „фронтранерите“ Црна Гора и Албанија.
Македонија бележи и значаен успех на меѓународен план. За првпат државата е избрана за членка на Економскиот и социјалниот совет на Обединетите нации – ЕКОСОК, за мандатниот период 2027–2029 година. Со тоа Македонија станува дел од едно од главните тела во системот на Обединетите нации.
Важна политичка порака испраќа и нацрт-извештајот на Комитетот за надворешни работи на Европскиот парламент за Македонија за 2025 година, во кој се потврдува дека Македонија останува јасно препознаена како европска држава посветена на реформите, регионалната стабилност и стратешкото партнерство со ЕУ и НАТО.
Покрај тоа, Македонија има заедничка изјава со ЕУ во делот на одбраната и безбедносната политика, а завршувањето на пост-мониторингот со Советот на Европа претставува уште една потврда дека државата ги исполнува демократските капацитети.
Македонската дипломатија посветено работеше и на зацврстување на билатералните односи. Во тој правец беа потпишани стратешки договори со значајни европски и светски партнери, меѓу кои САД, Обединетото Кралство, Хрватска и Унгарија.
Истовремено, по долги години се става крај на неработењето, понижувањето и потчинувањето на македонската дипломатија пред други држави, особено во односите со Бугарија. Владата предводена од ВМРО-ДПМНЕ го ратификуваше договорот со Бугарија за реализација на Коридорот 8, проект од клучно значење за Европа, регионот и Балканот.
Додека едните се сликаа на автопатишта со маички, делеа провизии преку анекси и потпишуваа бланко листови само за да останат ден повеќе на власт, ВМРО-ДПМНЕ работи на достоинствено претставување на државата и на конкретни чекори што носат реални резултати.
Додека некои имаа поданички однос кон странски центри на моќ, Владата на ВМРО-ДПМНЕ со државнички пристап постигнува напредок што денес го поздравуваат бројни претставници на земјите членки на ЕУ.
Сето ова е резултат на труд, работа и посветеност Македонија достоинствено да се претставува на меѓународен план. Се работеше долго и напорно, без големо фалење, далеку од очите на јавноста, но на крајот резултатите станаа видливи и конкретни.
Овој успех на македонската дипломатија и напредокот на државата не сакаат да го видат само СДС и Венко Филипче. За нив, под поимите „успех“ и „реформа“ се подразбира само промена на Уставот и внесување на Бугарите, со крајна цел редефинирање на македонската историја по бугарски терк.
Македонија денес покажува дека може да оди напред со достоинство, со јасни позиции и со заштита на националните интереси. Токму тоа најмногу им пречи на оние кои со години ја навикнаа државата на попуштање.
