СДС не може да избега од одговорноста за случувањата во Гостивар, бидејќи функционери поддржани од нив, како што се наведува, денес се сомничат дека ја загадиле водата во градот и околината, по што илјадници граѓани побарале лекарска помош.
Во соопштението се наведува дека СДС очекува гостиварчани да заборават на коалицијата со Арбен Таравари и ДУИ, но дека одговорноста за последиците од, како што се оценува, овој скандал не може да се игнорира.
Во реакцијата се посочува и дека претседателот на СДС, Венко Филипче, нема кредибилитет да говори за здравствени политики, при што се потсетува на неговиот мандат како министер за здравство.
За време на ковид-пандемијата Македонија била меѓу земјите со највисока стапка на смртност, а наместо навремена набавка на вакцини, се договарале провизии. Како дел од критиките се наведува и пожарот во модуларната болница во Тетово, во кој животот го загубија 14 лица. Иако биле обезбедени средства и проект за нов клинички центар, тој не бил реализиран. Исто така, се тврди дека наместо инвестиции во нови болници, операциони сали и медицинска опрема, се делеле тендери на блиски лица, а дел од медицинската опрема останувала неискористена.
„СДС и Филипче треба да размислат пред да зборуваат за здравјето на граѓаните. Поради нивните политики изгубивме илјадници граѓани“, се наведува во реакцијата на ВМРО-ДПМНЕ.
Институтот за јавно здравје (ИЈЗ) упати итен апел и насоки до жителите на Гостивар за користење на водата и превенција од заболувања кои се пренесуваат преку вода, откако е воведена забрана за нејзино користење од градскиот водовод.
Од Одделот за епидемиологија на заразни заболувања предупредуваат дека небезбедната вода може да биде извор на бактериски, вирусни и паразитарни инфекции кои предизвикуваат гастроентеритиси, објави 4news.mk Со цел да се спречи појава и ширење на заразни болести, надлежните наложуваат строго почитување на следниве заштитни мерки: Забрана за водата од водоводот во домаќинствата
Граѓаните не смеат да ја користат водата од градскиот водовод за пиење и за подготовка на храна. Наместо тоа, задолжително треба да се обезбеди фабрички пакувана (флаширана) вода, при што минималните потреби се проценети на најмалку 4 литри вода по лице на ден.
Водата од водоводот не смее да се користи за:
Подготовка на храна и оброци за доенчиња;
Миење на овошје и зеленчук кои се консумираат свежи;
Подготовка на мраз;
Подготовка на сокови, кафе, чај и други пијалаци.
Ригорозна хигиена и посебни правила за угостителите и градинките
Хигиената на рацете мора да се одржува исклучиво со сапун и безбедна (флаширана) вода, особено пред подготовка на храна, по користење тоалет, по менување пелени и по контакт со болно лице. Доколку нема безбедна вода, може да се користи дезинфициенс на база на алкохол, но само доколку рацете не се видливо извалкани. За миење заби мора да се користи единствено флаширана вода, додека за туширање може да се користи и превриена вода, со голем претпазливост да не се голтне.
Посебни обврски се наметнуваат и за рестораните, кафулињата и угостителските објекти, кои не смеат да ја користат водата од водоводот за пијалаци и миење на овошје/зеленчук, а машините за мраз мора целосно да се исклучат. Во детските градинки, децата мора да пијат исклучиво флаширана вода, а чешмите не смеат да се користат за полнење шишиња.
