СДС манипулира со инфлацијата, економските политики на Владата даваат резултати
СДС повторно се обидува да ја манипулира јавноста преку селективно користење статистики и ширење паника, свесно премолчувајќи го контекстот и причините за сезонските разлики во цените, реагираат од ВМРО-ДПМНЕ.
Од партијата посочуваат дека токму СДС ја довела државата до економски колапс, рекордна инфлација и сериозно нарушен животен стандард на граѓаните.
„Кога СДС зборува за инфлација, треба да се потсетат дека во нивно време инфлацијата достигна двоцифрени нивоа, а граѓаните плаќаа најскапа храна и струја во историјата. Граѓаните живееја со по 150 денари на ден“, наведуваат од ВМРО-ДПМНЕ.
Според партијата, денес инфлацијата постепено се стабилизира и покрај глобалната економска криза, енергетските шокови и последиците од војната во Европа, со кои се соочуваат сите држави.
„Факт е дека инфлацијата во април, споредено со март, изнесува 1,3 проценти, што покажува стабилизирање на цените и постепено смирување на инфлаторните притисоци. Она што СДС намерно го премолчува е дека годишната стапка од 5,7 проценти е резултат и на споредбената основа, бидејќи минатата година во овој период беа активни мерките за велигденската кошничка, кои привремено ги намалија цените на одредени производи“, се наведува во реакцијата.
Од ВМРО-ДПМНЕ истакнуваат дека Владата навремено презема мерки за заштита на животниот стандард на граѓаните и додаваат дека тие мерки биле позитивно оценети и од ММФ, како одговорни политики насочени кон стабилизација на економијата.
Во соопштението се наведува и дека Владата ги намалила акцизите на горивата, при што бензинот е поевтин за 2 денари, а дизелот за 4 денари, со што директно се намалува притисокот врз трошоците на граѓаните и компаниите.
„За разлика од СДС, кои оставаа кризи без решенија и ја туркаа државата во долгови без ефект, ВМРО-ДПМНЕ работи одговорно, домаќински и со конкретни политики за економска стабилност и поддршка на граѓаните“, се вели во соопштението на ВМРО-ДПМНЕ.
