Македонска Нација
Мицкоски вели дека е парадокс токму СДС да најавува антикорупциски закон, потсетувајќи на измените на Кривичниот законик кои, според него, довеле до амнестирање на криминалот од поранешната власт.
Премиерот Христијан Мицкоски остро реагираше на најавите од СДС за подготовка на антикорупциски закон, оценувајќи дека јавноста со право гледа со недоверба на ваквите иницијативи кои доаѓаат од партија што, според него, оставила длабоки траги на неказнивост и корупција во изминатите години.
СДС веќе извесен период најавува подготовка на антикорупциски закон кој, според лидерот на партијата Венко Филипче, треба да означи крај на неказнивоста и воспоставување систем во кој секој што го прекршил законот ќе сноси одговорност.
Коментирајќи ги овие најави, Мицкоски истакна дека првично мислел оти станува збор за политичка шега.
„Кога неодамна го слушнав ова, мислев дека е нешто што го прочитав во рубриката ‘верувале или не’. Затоа се воздржав од коментар и почекав да помине некое време, но гледам дека тие оваа работа ја тркалаат и навистина изгледа веруваат во оваа работа“, изјави Мицкоски.
Тој потсети дека токму поранешната власт предводена од СДС го измени Кривичниот законик, потег што, според него, директно придонел за амнестирање на бројни случаи поврзани со висок криминал и злоупотреби на функциите.
„Во оваа работа веруваат луѓето, односно дечињата на принцот на криминалот кој за да се амнестира себеси и криминалот што го правеше заедно со своите дечиња кои сега ги инсталира во СДСМ, го смени Кривичниот законик со што практично се амнестираше сиот криминал што го правеа како влада“, нагласи премиерот.
Мицкоски оцени дека јавноста е оправдано збунета од обидите на СДС да се претставува како предводник на борбата против криминалот и корупцијата, додавајќи дека токму политиките на оваа партија во минатото придонеле за нарушување на довербата во институциите.
Според него, дополнителна причина за вознемиреноста кај опозициските структури е засиленото дејствување на институциите во насока на расчистување на сомнежите за криминал и корупција.